کینیڈا میں ایک شخص کا 51 سال قبل گم ہونے والا بٹوہ اچانک مل گیا جسے دیکھ کر مالک حیران بھی ہوا اور خوش بھی۔
رچرڈ گیلوری کا بٹوہ 1975 میں کینیڈا کے علاقے ڈارٹ ماؤتھ میں گم ہوگیا تھا۔ 51 سال بعد ایک گھر کی مرمت کے دوران بڑھئی میٹی گولڈ اسمتھ کو یہ بٹوہ فرش کے نیچے سے ملا۔
بٹوے میں رچرڈ گیلوری کا ڈرائیونگ لائسنس، ہائی اسکول اسٹوڈنٹ آئی ڈی، ہاتھ سے لکھا برتھ سرٹیفکیٹ، ایک ڈالر کا نوٹ اور تھیٹر ڈرامے کا ٹکٹ موجود تھا۔
میٹی گولڈ اسمتھ نے سوشل میڈیا کے ذریعے بٹوے کے مالک کو تلاش کرنے کی کوشش کی جس پر رچرڈ کی اہلیہ ڈونا گیلوری نے بٹوے میں موجود اشیا کی شناخت کرلی۔
یوں پانچ دہائیوں سے زائد عرصے بعد بٹوہ اپنے اصل مالک تک پہنچ گیا۔ رچرڈ گیلوری نے کہا کہ وہ بٹوہ واپس ملنے پر بہت حیران اور خوش ہیں۔
انہوں نے بتایا کہ بٹوے میں موجود بعض اشیا نے انہیں مزید حیران کیا کیونکہ انہیں یاد نہیں تھا کہ انہوں نے 1975 میں تھیٹر ڈرامہ دیکھا تھا۔ ہاتھ سے لکھا ہوا برتھ سرٹیفکیٹ دیکھ کر بھی وہ حیران ہوئے اور انہیں یاد نہیں کہ ان کے والدین نے وہ دستاویز انہیں کیوں دی تھی۔