برطانیہ کے شہر یارکشائر کے ایک چڑیا گھر میں ٹائیگر کے احاطے میں داخل ہونے والا شخص حملے میں ہلاک ہوگیا، تاہم انتظامیہ نے ٹائیگر کو ہلاک نہ کرنے کا فیصلہ کیا ہے۔
جنوبی یارکشائر پولیس کے مطابق واقعہ ہفتے کے روز پیش آیا، جب دوپہر تقریباً ایک بجے ایک شخص کے ٹائیگر کے احاطے میں داخل ہونے کی اطلاع ملی۔ ٹائیگر کے حملے میں وہ شدید زخمی ہوگیا۔ امدادی کارکنوں نے موقع پر پہنچ کر اسے طبی امداد فراہم کی، تاہم وہ جانبر نہ ہوسکا۔
میڈیا رپورٹس کے مطابق سوشل میڈیا پر گردش کرنے والی ویڈیوز میں شخص کو ٹائیگر کے قریب دیکھا جاسکتا ہے، جس کے بعد جانور اس پر حملہ کردیتا ہے۔ واقعے کے بعد چڑیا گھر کو خالی کرا کے بند کردیا گیا۔
چڑیا گھر انتظامیہ نے واضح کیا کہ امور نسل کا ’الٹائی‘ نامی ٹائیگر محفوظ ہے اور اسے واقعے کے بعد ہلاک نہیں کیا جائے گا۔ حکام کے مطابق جانور اپنے احاطے میں موجود رہا اور عوام کو کسی وسیع تر خطرے کا سامنا نہیں تھا۔
واقعے کے بعد سوشل میڈیا پر ٹائیگر کو ہلاک کرنے کے مطالبات بھی سامنے آئے، جبکہ بعض افراد نے واقعے کا ذمہ دار احاطے میں داخل ہونے والے شخص کو قرار دیا۔ چڑیا گھر اتوار کو بھی بند رہا۔