امریکی صدر ڈونلڈ ٹرمپ نے سعودی عرب کو یمن کے حوثیوں کے خلاف اسرائیل کی مدد کی پیشکش قبول کرنے کا مشورہ دے دیا۔ وائٹ ہاؤس میں صحافیوں سے گفتگو کرتے ہوئے ٹرمپ نے کہا کہ اسرائیل سعودی عرب کے لیے بہت مددگار ثابت ہوا ہے اور ریاض کو اس کی پیشکش قبول کرلینی چاہیے۔
اطلاعات کے مطابق اسرائیلی وزیراعظم نیتن یاہو نے امریکی ثالثی کے ذریعے سعودی عرب کو حوثیوں کے خلاف معاونت کی پیشکش کی تھی۔ تاہم سعودی ولی عہد محمد بن سلمان نے ممکنہ عوامی ردعمل کے خدشے کے باعث اس اقدام کی مخالفت کی۔
دوسری جانب ٹرمپ نے ایران کے جوہری پروگرام سے منسلک زیرِ زمین مقام ’پک ایکس ماؤنٹین‘ پر ممکنہ امریکی حملے کا عندیہ بھی دیا ہے۔ ان کا کہنا تھا کہ ایران کو جوہری ہتھیار حاصل کرنے سے روکنے کے لیے امریکا کو اس مقام کو نشانہ بنانا پڑ سکتا ہے۔ تاہم ٹرمپ نے واضح کیا کہ ایران کے خلاف جنگ میں جوہری ہتھیار استعمال نہیں کیے جائیں گے۔