کروشیا کے جزیرے براچ پر منعقدہ زیتون توڑنے کی عالمی چیمپئن شپ فن لینڈ کی ٹیم نے جیت لی ہے، حالانکہ اس ملک میں زیتون کا ایک بھی درخت موجود نہیں۔
اس سالانہ مقابلے میں 10 ممالک کی ٹیموں نے حصہ لیا، جن میں ہر ٹیم دو مرد اور دو خواتین پر مشتمل تھی اور انہیں 45 منٹ میں زیادہ سے زیادہ زیتون توڑنے کا ہدف دیا گیا تھا۔
شرکا نے ہاتھوں سے زیتون توڑ کر زیتون جمع کرنے والے روایتی بوری نما تہبند 'ساکیتے' استعمال کیے، اور زیتون توڑنے کے بعد انہیں ٹیم کے کریٹ میں منتقل کرتے رہے۔
فن لینڈ کی ٹیم نے مقررہ وقت میں تقریباً 55.4 کلوگرام زیتون توڑ کر مقابلہ جیت لیا۔
فن لینڈ کے ٹیم کپتان پیٹری اُتریاینن نے بتایا کہ ان کا مقصد گزشتہ سال کی چوتھی پوزیشن سے بہتری لانا تھا لیکن عالمی چیمپئن بننے کی انہیں کوئی توقع نہیں تھی، اور یہ سب کسی خواب جیسا ہے۔