کراچی کے علاقے گلشنِ حدید فیز تھری میں نامعلوم مسلح ملزم کی فائرنگ کے نتیجے میں سابق ایس ایچ او جاوید ابڑو جاں بحق جبکہ ان کی اہلیہ زخمی ہوگئیں۔
پولیس ذرائع کے مطابق سابق ایس ایچ او جاوید ابڑو اپنی اہلیہ کے ہمراہ گھر کے باہر بیٹھے تھے کہ ایک ملزم نے ان پر فائرنگ کردی۔
فائرنگ کے نتیجے میں جاوید ابڑو کو سات گولیاں لگیں اور وہ موقع پر ہی دم توڑ گئے، جبکہ ان کی اہلیہ کو زخمی حالت میں اسپتال منتقل کیا جا رہا ہے۔
پولیس ذرائع کا مزید کہنا ہے کہ فائرنگ کرنے والا اکیلا ملزم واردات کے بعد چند قدم کے فاصلے پر کھڑی موٹر سائیکل پر بیٹھ کر فرار ہوگیا۔
واقعے کی اطلاع ملتے ہی تھانہ اسٹیل ٹاؤن پولیس اور قانون نافذ کرنے والے اداروں کی بھاری نفری فوری طور پر جائے وقوعہ پر پہنچ گئی۔ کرائم سین یونٹ نے علاقے کو گھیر کر شواہد جمع کرنا شروع کردیے ہیں۔
واضح رہے کہ انسپکٹر جاوید ابڑو کراچی کے مختلف تھانوں میں بطور ایس ایچ او فرائض سر انجام دے چکے تھے۔