امریکا میں ایک پائلٹ نے اپنے طیارے کی مدد سے آسمان پر مشہور ویڈیو گیم ’گرینڈ تھیفٹ آٹو 6‘ (GTA 6) کی دیوہیکل تصویر بنا کر سب کو حیران کردیا۔
سوشل میڈیا پر ’دی پائلٹ پکاسو‘ کے نام سے مشہور بینجمن میک ڈینیئل نے سیسنا اسکائی لین آر جی طیارے کے ذریعے مخصوص راستوں پر پرواز کرکے آسمان پر گیم کا منفرد نقشہ تیار کیا۔
اس فضائی تصویر میں گیم کا لوگو، ہیلی کاپٹر، مگرمچھ، کھجور کے درخت، اسپورٹس کار اور ایک خاتون کی شبیہ بھی شامل ہے۔
بینجمن نے امریکی ریاست آرکنساس کے بینٹن ویل ایئرپورٹ سے صبح 11 بج کر 29 منٹ پر پرواز شروع کی اور 8 گھنٹے 8 منٹ بعد واپس پہنچے۔
پائلٹ نے مزاحیہ انداز میں کہا کہ تصویر بنانے میں صرف 8 گھنٹے لگے، لیکن وہ اس لمحے کا 11 سال سے انتظار کر رہے تھے۔
ان کی اس منفرد کاوش کو سوشل میڈیا صارفین کی جانب سے خوب پذیرائی مل رہی ہے۔