پیٹرول پمپ مالکان نے وزیراعظم سے قیمتوں میں ماہانہ بنیاد پر ردوبدل کی درخواست کردی

image

پیٹرول پمپ مالکان نے وزیراعظم محمد شہباز شریف سے پیٹرولیم مصنوعات کی قیمتوں میں روزانہ کی بنیاد پر تبدیلی کے بجائے ماہانہ بنیادوں پر ردوبدل کرنے کی درخواست کردی۔

پیٹرول پمپ مالکان کی جانب سے وزیراعظم کو ارسال کیے گئے خط میں مؤقف اختیار کیا گیا ہے کہ پیٹرولیم مصنوعات کی قیمتوں میں روزانہ تبدیلی کے باعث پمپ مالکان کو مالی نقصان کا سامنا کرنا پڑتا ہے۔

خط میں کہا گیا ہے کہ قیمتوں میں مسلسل اتار چڑھاؤ کے باعث کاروباری منصوبہ بندی اور پیٹرولیم مصنوعات کے اسٹاک کا انتظام بھی مشکل ہوگیا ہے۔ قیمتوں میں کمی کی صورت میں پمپ مالکان کو پہلے سے مہنگے داموں خریدا گیا پیٹرول کم قیمت پر فروخت کرنا پڑتا ہے، جس سے انہیں براہِ راست مالی نقصان برداشت کرنا پڑتا ہے۔

پیٹرول پمپ مالکان نے وزیراعظم سے مطالبہ کیا ہے کہ پیٹرولیم مصنوعات کی قیمتوں میں تبدیلی کا موجودہ طریقہ کار تبدیل کرکے ماہانہ بنیادوں پر قیمتوں کا تعین کیا جائے تاکہ کاروباری معاملات میں استحکام پیدا ہوسکے اور مالکان کو مسلسل مالی نقصان سے بچایا جاسکے۔


Meta Urdu News: This news section is a part of the largest Urdu News aggregator that provides access to over 15 leading sources of Urdu News and search facility of archived news since 2008.

Follow US