ملک میں میوچل فنڈز کے زیرانتظام مجموعی اثاثوں (اے یو ایمز) کا حجم اکتوبر 2026ء میں 4.73 ٹریلین روپے ریکارڈ کیا گیا، جبکہ ایکویٹی میوچل فنڈز کے اثاثوں میں ماہانہ بنیادوں پر 4 فیصد کمی واقع ہوئی ہے۔
میوچل فنڈ ایسوسی ایشن آف پاکستان اور عارف حبیب ریسرچ کے جاری کردہ اعداد و شمار کے مطابق گزشتہ ماہ میوچل فنڈز کے کل اثاثے 4,734 ارب روپے ریکارڈ کیے گئے جو ستمبر کے مقابلے میں تقریباً مستحکم ہیں۔ مجموعی اثاثوں میں 605 ارب روپے ایکوٹی فنڈز پر مشتمل رہے، جن میں روایتی ایکوٹی فنڈز کا حصہ 364 ارب روپے اور شرعی اصولوں کے مطابق کام کرنے والے ایکوٹی فنڈز کا حصہ 240 ارب روپے رہا۔
اکتوبر میں روایتی ایکوٹی فنڈز کے اثاثے ماہانہ بنیادوں پر 3 فیصد جبکہ شریعہ کمپلائنٹ ایکوٹی فنڈز کے اثاثے 5 فیصد کم ہوئے، جس کے بعد کل میوچل فنڈز میں ایکوٹی فنڈز کا حصہ 13 فیصد اور دیگر کیٹیگریز کے فنڈز کا تناسب 87 فیصد رہا۔
اعداد و شمار کے مطابق اثاثہ جاتی انتظامی کمپنیوں میں میزان انویسٹمنٹ مینجمنٹ لمیٹڈ 755 ارب روپے کے زیرانتظام اثاثوں کے ساتھ پہلے نمبر پر رہی۔ این بی پی فنڈ مینجمنٹ لمیٹڈ 595 ارب روپے کے ساتھ دوسرے، الفلاح اثاثہ جاتی انتظامی کمپنی 443 ارب روپے کے ساتھ تیسرے، ایم سی بی انویسٹمنٹ مینجمنٹ لمیٹڈ 438 ارب روپے کے ساتھ چوتھے اور یو بی ایل فنڈ منیجرز 409 ارب روپے کے اثاثوں کے ساتھ پانچویں پوزیشن پر رہے۔
مزید برآں، زیرانتظام اثاثوں میں ایکوٹی فنڈز کے تناسب کے لحاظ سے نیشنل انویسٹمنٹ ٹرسٹ 52 فیصد کے ساتھ نمایاں رہا، جبکہ اے کے ڈی انویسٹمنٹ مینجمنٹ میں یہ شرح 45 فیصد اور اٹلس اثاثہ جاتی انتظامی کمپنی میں 35 فیصد ریکارڈ کی گئی۔