کراچی……ثانوی تعلیمی بورڈکراچی کے چیئرمین سید شرف علی شاہ کی خصوصی ہدایت پر جماعت نہم سائنس وجنرل گروپ ریگولرکے سالانہ امتحانات کیلئے انرولمنٹ فارم سال 2022 ء بغیر لیٹ فیس کے جمع کرانے کی تاریخ میں دوسری بار 14جنوری 2022ء تک توسیع کر دی گئی ہے۔ انہوں نے کہا کہ اسکولوں میں موسم سرما کی تعطیلات کے باعث اسکولوں اور والدین کو سہولت فراہم کرنے کیلئے تاریخ آگے بڑھائی جا رہی ہے لہٰذا جن اسکولوں نے ابھی تک طلباء و طالبات کے انرولمنٹ فارم جمع نہیں کرائے ہیں وہ جلد ہی فارم جمع کرا دیں۔ تاریخ گزرنے کے بعد نئے شیڈول کے مطابق انرولمنٹ فارم لیٹ فیس کے ساتھ جمع کئے جائیں گے۔گورنمنٹ اسکول بھی اسی شیڈول کے مطابق بغیر کسی فیس کے انرولمنٹ فارم جمع کرا سکتے ہیں۔ دریں اثناء لیٹ فیس کے ساتھ 17جنوری سے یکم فروری تک 200 روپے، 2فروری سے16فروری تک 600روپے،17فروری سے 4مارچ تک 1200روپے،7مارچ سے 18مارچ تک 1800روپے،21مارچ سے 4اپریل تک 2000روپے اورآخری تاریخ گزرنے کے بعد2500 روپے لیٹ فیس کے ساتھ امتحانی فارم جمع کئے جائیں گے۔ اسکولوں کے سربراہان کو تاکید کی جاتی ہے کہ فارم کو جمع کرانے کیلئے طلباء وطالبات کو انفرادی طور پر بورڈ آفس نہ بھیجا جائے۔