کرکٹ کے میدان میں افغانستان اور پاکستان میں بھی وہ چیز دیکھنے کو مل رہی ہے، جو کہ پاکستان اور بھارت کے مابین دکھائی دیتی تھی۔
لیکن آج ایک ایسے افغان کھلاڑی کے بیٹے کے بارے میں بتائیں گے جو کہ پاکستانی ٹیم میں کھیلنے جا رہا ہے۔
جی ہاں، افغانستان کرکٹ ٹیم کے کپتان محمد نبی کے بیٹے حسن عیسیٰ خیل پاکستان جونئیر لیگ میں حصہ لینے کے لیے پاکستان کے دل لاہور پہنچ گئے ہیں۔
حسن عیسیٰ خیل راولپنڈی ریڈرز کا حصہ ہیں، جبکہ انہوں نے ایل سی سی اے گراؤنڈ میں پریکٹس بھی کی۔ محمد نبی کے بیٹے حسن کا پاکستانی میڈیا سے بات چیت میں کہنا تھا کہ پاکستان جونئیر لیگ کا سنا تو والد سے اس ایونٹ کا تذکرہ کیا تھا، اور پھر انہوں نے ڈرافٹ میں میرا نام شامل کیا۔
انہوں نے مزید بتایا کہ افغانستان کے کئی کھلاڑی اس ایونٹ کا حصہ ہیں، مجھے خوشی ہے، کہ میں اس ایونٹ کا حصہ بن چکا ہوں۔
دوسری جانب ایونٹ کی فیس سے متعلق بھی حسن نے اظہار خیال کیا اور بتایا کہ جب مجھے پتہ چلا کہ اس لیگ سے پیسے بھی ملیں گے، تو میں نے تب ہی سوچ لیا تھا کہ رقم سے کرکٹ کا سامان لوں گا اور ون آن ون کوچنگ سیشن لوں گا۔
حسن عیسیٰ خیل اننگز اوپنر اور آل راؤنڈز ہیں، تاہم انہیں بیٹنگ میں دلچسپی ہے۔ واضح رہے پاکستان جونئیر لیگ 6 اکتوبر سے لاہور کے قذافی اسٹیڈیم میں شروع ہو رہے ہیں۔