قومی کرکٹ ٹیم کے کپتان اور دنیا کرکٹ کے بے تاج بادشاہ بابراعظم کو افغانستان کے ساتھ سیریز کے بعد گھر آنے پر اہل خانہ نے شاندار تحفہ دیکر حیران کردیا۔
بابر اعظم کے بھائی فیصل نے یوٹیوب پر وی لاگ شیئر کیا ہے جس میں ون ڈے کے نمبر ون بیٹر بننے کی خوشی میں بابر اعظم کو مہنگی ترین گاڑی ’آڈی، ای ٹرون جی ٹی‘ بطور تحفہ دے دی۔
فیصل اعظم کے مطابق اس الیکٹرک گاڑی کا شمار بابر اعظم کی پسندیدہ گاڑیوں میں ہوتا ہے، جس کی قیمت پاکستانی مالیت میں تقریباً 5 سے 8 کروڑ تک ہے۔
وی لاگ میں بابر اعظم کو تحفہ پاکر خوش اور اس سفید رنگ کی آڈی گاڑی کو چلاتے ہوئے بھی دیکھا جاسکتا ہے۔
یہ بات مشہور ہے کہ پاکستان کرکٹ ٹیم کے کپتان بابر اعظم کو آڈی کاروں سے گہرا لگاؤ ہے۔ ان کے پاس پہلے سے ہی ایک آڈی فائیوہے اور ’آڈی، ای ٹرون جی ٹی کے ساتھ بابر کی کار کلیکشن میں مزید اضافہ ہوگیا ہے۔
ویڈیو میں بابر کے بھائی نے نئی الیکٹرک کار خریدنے کی کہانی شیئر کرتے ہوئے بتایا کہ انہوں نے تقریباً ڈیڑھ ماہ قبل تلاش شروع کی تھی۔ بابر نے ہمارے لیے بہت کچھ کیا ہے، اس لیے ہم اسے سرپرائز گفٹ دینا چاہتے تھے۔ اس لیے ہم نے مختلف کاروں کی تلاش شروع کر دی۔
انہوں نے کہا کہ 4، 5 مختلف ماڈلز پر غور کرنے کے بعد انہوں نے اس کار کا انتخاب کیا،ہم نے خاص طور پر سفید رنگ چنا کیونکہ یہ پاکستان میں بہت کم ہے۔