کھانے کی میز پر کچھ موجود ہو یا نہ ہو ایک پلیٹ گرما گرم بریانی ہو، جس کی خوشبو دور دور تک جائے اور اپنے طرف کھینچ لائے ۔۔ کیا ہوا منہ میں پانی آگیا؟ ارے جناب عید کے دن اسپیشل فرمائشی بریانی بنوانی ہے تو اس ریسیپی کو استعمال کریں اور عید کی خوشیوں میں ذائقہ بھی بڑھائیں۔
چونکہ بریانی گھر پر بنانے سے اس میں بازار جیسا ذائقہ اور رنگ نہیں آتا ہے، اس لئے آج ہم آپ کے لئے لائے ہیں مشہور شیف زبیدہ آپا کی بتائی ہوئی سب سے خاص ٹپ جو سب کے لئے کارآمد ہے۔
زبیدہ آپا کی مشہور ہوٹل جیسی بریانی بنانے کی ٹپ:
• چاولوں کو بھگوئیں اور ابالنے رکھ دیں اس میں تھوڑا سا زیرہ اور تین تیز پات ڈال کر اچھی طرح ابال لیں۔
• اب آپ ٹماٹر، پیاز، لہسن اور ادرک کا پیسٹ بنا لیں۔
• ایک بھگونے میں آئل اور آدھا چمچ زیرہ ڈالیں اور اس کو گرم کرکے گوشت کو ہلکا سا بھون لیں۔
• بیس منٹ بعد جب گوشت ہلکا براؤن ہو جائے تو اس کو نکال کر الگ رکھ دیں اور اسی آئل میں کٹے ہوئے آلوؤں کو اچھی طرح گلا لیں۔
• پھر توے پر زیرہ، ہلدی، دھنیا، جائفل جاوتری پاوڈر، کالی مرچ، ثابت لال مرچ، لونگ، بادیان کے پھول اور آدھا کٹا ہوا ٹکڑا ادرک ڈال کر بیس منٹ تک ان کو بھون لیں۔
• اب اس کو ایک پیالے میں نکالیں اور اس میں صرف ایک قطرہ کھیوڑہ، آدھا چمچ زردے کا رنگ اور املی کا پیسٹ مکس کرلیں۔
• پھر ان تمام اجزاء کو بھگونے میں ڈالیں اور ادرک لہسن، ٹماٹر اور پیاز کا پیسٹ، گوشت، آلو، لیموں کا رس ڈال کر گوشت کو مصالحے میں بھون لیں تاکہ گریوی اچھی تیار ہو جائے۔
• ایک کپڑا لیں اس میں چائے کی پتی ایک چمچ رکھ دیں اور اس کی پوٹلی بنا کر رکھیں اور گریوی میں ڈال کر 5 منٹ تک دم پر رکھ دیں۔
• پھر ایک بڑے بھگونے میں تھوڑا سا آئل ڈالیں اور چاولوں کی ایک تہہ ڈالیں پھر سالن ڈالیں اور کٹی ہوئی ہری مرچیں ڈالیں پھر چاولوں کی تہہ ڈالیں اور سالن ڈالیں پھر تھوڑے سے چاول اور کٹے ہوئے باریک ٹماٹر، تھوڑی سی ادرک، لیموں کٹے ہوئے ڈالیں اور دم لگا دیں۔
• لیجیئے تیار ہے آپ کی زبردست بازار جیسی سپیشل بریانی ۔ تو ان گھر میں ہی بنائیں اور ذائقہ سے مزہ اٹھائیں۔
• اس کو ہری چٹنی کے رائتے کے ساتھ سروو کیجیئے، عید کا مزہ دوبالا کریں۔