مکھیوں کو بھگانے کا ہر طریقہ آزما چکے ہیں لیکن یہ ہیں کہ جان چھوڑنے کا نام ہی نہیں لیتی ہیں۔ پہلے مکھیوں کو ہاتھ سے اڑانے سے وہ بھاگ جاتی تھیں لیکن اب تو چپک جاتی ہیں اور جسم پر لگیں تو چپچپاہٹ محسوس ہوتی ہے۔ ہر کوئی اس سے پریشان ہے۔ ہم بھی آپ کو پہلے بھی مکھیوں کو بھگانے کے کئی طریقے بتا چکے ہیں جن سے یقیناً آپ کی مدد ہوئی ہوگی۔ پھر بھی اگر مکھیاں آپ کا پیچھا نہیں چھوڑ رہی ہیں تو ایک اور نئی ترکیب کے ساتھ ہم موجود ہیں آپ کی مدد کرنے کے لئے۔
ٹپ :
٭ مچھروں کو بھگانے والے گلوب کو اچھی طرح پیس لیجیے کہ بالکل پاؤڈر تیار ہو جائے اور پھر اس میں چینی شامل کرلیں اور اچھی طرح ہاتھوں کی مدد سے مکس کیجیے۔ چاہیں تو چینی کا بھی پاؤڈر استعمال کرلیں تاکہ یکجان ہونے میں آسانی ہو جائے اب اس میں ایک چمچ یا آدھا چمچ گلیسرین شامل کرلیں تاکہ مرکب تھوڑا سا گیلا ہو جائے اور چمکتے ہوئے چُورے کی مانند نظر آئے۔
اس کو ایک پلیٹ میں نکال کر گھر کے اس حصے یا کونوں میں رکھیں جہاں مکھیاں آتی ہیں اور پھر کمال دیکھیں۔ چونکہ گلیسرین خوشبو کو بڑھائے گی اور گلوب مکھیوں کو اپنی طرف متوجہ کرے گا، پھر میٹھی چینی اس میں جان لینے کا کام کرے گی یوں مکھیاں بھی بھاگ جائیں گی اور جسم سے چپکیں گیں بھی نہیں۔