گیس کی بندش کی وجہ سے ایل پی جی سلنڈر کا استعمال بہت عام ہوچکا ہے، سلنڈر سے جہاں فوری کھانا بنانے کی سہولت میسر آتی ہے وہیں برتن کالے ہونے کا مسئلہ بھی پیدا ہوتا ہے تاہم اس رپورٹ میں ہم آپ کو پانی گرم کرنے اور سلنڈر کی وجہ سے کالے ہونے والے دوسرے برتنوں کو صاف کرنے کا آسان طریقہ بتائیں گے۔

سلنڈر کے استعمال سے اکثر کھانا پکانے کے دوران برتن کالے ہوجاتے ہیں، ایسے برتنوں کی صفائی کے لیے بازار میں مختلف اقسام کے صابن اور پاؤڈر دستیاب ہیں لیکن باورچی خانے میں پائے جانیوالے کچھ اجزاءایسے برتنوں کی صفائی کیلئے ہرچیز سے زیادہ بہتر ثابت ہوسکتے ہیں۔

سرکہ اور میٹھا سوڈا آپ کے کچن میں موجود ایسی چیزیں ہیں جن کی مدد سے آپ بدترین جلے ہوئے برتنوں کو بھی نئے جیسے چمکدار بناسکتے ہیں۔

آپ ایک کپ سرکہ، دو چمچ میٹھا سوڈا، اور ایک کپ پانی لے لیں۔ دھونے والے برتن میں کچھ پانی ڈال کر اس میں سرکہ ڈال دیں اور چولہے پر رکھ دیں۔ جب پانی ابلنے لگے تواسے اتار لیجئے۔ اب اس میں میٹھا سوڈا ڈالیں اور کچھ دیر بعد برتن دھولیں۔

اگر اب بھی کچھ ضدی داغ باقی ہوں تو ان پر بیکنگ سوڈے کا پیسٹ بنا کر لگادیں اور کچھ دیر بعد جب دوبارہ برتن دھوئیں گے تو یقینا یہ داغ بھی صاف ہو جائیں گے ۔