بکرا عید ہو اور گھر میں کلیجی نہ بنے ایسا تو ہو نہیں سکتا، بڑی عید پہ جہاں ایک طرف قربانی ہوتی ہے وہیں دوسری طرف کلیجی چولہے پر چڑھ جاتی ہے۔ پر اکثر خواتین کو یہ مسئلہ درپیش ہوتا ہے کہ اتنا دھونے اور پکانے کے باوجود بھی کلیجی کی بدبو ختم نہیں ہوتی جس سے کھانے کا مزہ خراب ہوجاتا ہے۔ آج ہم لائے ہیں کچھ ایسے نسخے جس سے آپ کی یہ پریشانی دور ہوجائے گی۔
کلیجی کی بدبو دور کرنے کا طریقہ:
۔ ایک بڑا ثابت لہسن لے کے اسے بنا چھلکا اتارے کچل لیں، اب اسے اچھی طرح کلیجی پر لگا کر آدھے گھنٹے کے لیئے رکھ دیں۔ پھر اسے پانی سے دھو کر چھنی سے چھان لیں تاکہ سارا پانی نکل جائے، اس کے بعد جب آپ پکائیں گے تو کلیجی میں بدبو نہیں آئے گی۔
۔ کلیجی پکانے پہلے تیل میں چار دانے میتھی دانے کے ڈالنے سے بھی اسکی بدبو دور ہوجاتی ہے۔
۔ کلیجی کاٹنے سے پہلے اسے چھ سے سات پانی سے دھولیں تاکہ اس میں موجود جما ہوا خون اور گند اچھے سے نکل جائے۔
۔ کلیجی کو بنا دھوئے اس میں لیموں نچوڑ کے ڈال دیں بیج سمیت اور پندرہ منٹ کے لیئے چھوڑ دیں پھر پانی سے دھو کر پکائیں ایسا کرنے سے بدبو ختم ہوجائے گی۔
۔ کلیجی کو چھوٹے ٹکروں میں کاٹنے کے بعد پانی میں ڈال کر اس میں چار سے پانچ چمچ سفید سرکہ شامل کریں اور بیس منٹ کے لیئے رکھ دیں اس سے آپ کی کلیجی بلکل صاف ہوجائے گی اور بُو بھی مٹ جائے گی۔