کپڑوں کا خیال خواتین مردوں سے زیادہ رکھتی ہیں اور ان کی یہی خواہش ہوتی ہے کہ ان کے کپڑے ہمیشہ نئے نظر آئیں نہ ان کا رنگ خراب ہو اور نہ ہی ان کی شان، مگر ایسا ممکن ہوتا نہیں ہے اور جیسے ہی کپڑوں کا رنگ مدھم پڑنے لگتا ہے وہ کپڑے الماریوں کے کونوں میں گھسا کر رکھ دیئے جاتے ہیں اور پھر کچھ وقت کے بعد الماری کھولیں تو ان کپڑوں کو دیکھ کر دل چاہتا ہے کہ دوبارہ پہن لیئے جائیں لیکن پھیکا رنگ دیکھ کر دل نہیں چاہتا تو آج ہماری ویب آپ کو بتانے جا رہا ہے اپنے کپڑوں کو گھر میں خود کیسے ڈائی کریں؟
ٹپ
٭ ایک بالٹی پانی گرم کرلیں اس طرح کہ پانی ابل جائے۔
٭ پھر اس میں ایک چمچ کھانے کا رنگ (جو آپ کو پسند ہو) وہ ڈال کر 3 منٹ پکائیں۔
٭ 15 سے 25 روپے کا ڈائی رنگ بازار میں آسانی سے مل جاتا ہے اس کو خرید لیں۔
٭ اس ڈائی رنگ کو ایک پلیٹ میں نکالیں اور ساتھ ہی آدھا چمچ ہلدی مکس کریں۔
٭ پھر ہلدی ملے ہوئے رنگ کو اُبلتے ہوئے پانی میں ڈال کر مکس کرلیں اور 15 منٹ مزید پکا لیں۔
٭ اب چولہے کی آنچ ہلکی کریں اور اس میں اپنے کپڑے ڈال کر ایک مرتبہ کسی لکڑی یا بڑے چمچ سے خوب چلائیں۔
٭ لیجیئے رنگ ہوگئے آپ کے پُرانے کپڑے۔
٭ اگر آپ چاہتی ہیں کہ ان کپڑوں میں دھاریوں نُما رنگ آئے تو آپ کپڑوں کو اچھی طرح طے کریں اور ان میں تین تین انچ کے فاصلے سے دھاگہ باندھ دیں۔
٭ پھر ان کو رنگ میں 20 منٹ پکا لیں۔
٭ پھر ان کو نکالیں اور سادے پانی سے دھو کر سُکھا دیں۔
٭ آخر میں جب کپڑے سوکھ جائیں تو ہی دھاگے کھولیں۔
٭ لیجیئے پُرانے کپڑے نئے ڈیزائن اور نئے رنگ میں ہوجائیں گے تیار۔