روز کھانا بنانا کافی وقت اور محنت طلب کام ہے. اگر خواتین نوکری پیشہ ہوں تو روز کھانا تیار کرنا اور بھی مشکل ہوجاتا ہے
البتہ آج ہم آپ کو مشہور بھارتی شیف پنکج بھدوریا کا بتایا ہوا ایسا سالن بنانے کا طریقہ بتائیں گے جسے ایک بار بنا کر آپ فریج میں محفوظ کرلیں تو نہ صرف اس سالن سے منٹوں میں کھانا تیار ہوجائے گا بلکہ چھولے، کوفتے، آلو مٹر سمیت کم سے کم 50 مختلف سالن بنائے جا سکتے ہیں.
اس کو بنانے کے لیے 4 بڑی پیاز، 8 بڑے سرخ ٹماٹر، 4 انچ کا ادرک کا ٹکڑا، 6 سے 8 ہری مرچیں، ایک چمچ لہسن کا پیسٹ، دو کھانے کے چمچ لال مرچ پاؤڈر، دو کھانے کے چمچ دھنیا پاؤڈر، ، ایک چمچ ہلدی پاؤڈر، دو چمچ گرم مصالحہ پاؤڈر، ایک چمچ سیاہ زیرہ (کاراوے سیڈز)، ایک چمچ زیرہ، دو انچ کا دار چینی کا ٹکڑا، 2 سے 3 تیز پات، 5 سے 6 سبز الائچی، 7 سے 8 لونگ، 12 سے 15 کاجو، ایک چمچ نمک، آدھا کپ تیل لیں.
سب سے پہلے پیاز، ہری مرچ اور ادرک کو باریک کاٹ لیں اور ٹماٹر کو بھی کاٹ لیں۔ ایک پیالے میں پاؤڈر مصالحے آدھا کپ پانی ڈال کر پیسٹ بنا لیں۔ اس کے بعد ایک پین میں تیل گرم کریں۔ سارا مصالحہ اور نمک شامل کریں اور پیسٹ کو دانے دار ہونے تک پکنے دیں۔ اب کٹی ہوئی پیاز ڈال کر ہلکی آنچ پر بھونیں یہاں تک کہ اس کا رنگ ہلکا ہو جائے۔ اس کے بعد کٹی ہوئی ادرک اور مرچیں ڈال کر پیاز کے سنہری ہونے تک بھونیں۔ اب مصالحہ پیسٹ ڈالیں اور تیل کے اوپر آنے تک پکائیں۔ کٹے ہوئے ٹماٹر ڈالیں اور اس وقت تک پکائیں جب تک ٹماٹر گودا نہ ہو جائیں اور تیل دوبارہ سطح پر آجائے۔ اس کے بعد کاجو کا پیسٹ ڈال کر اچھی طرح مکس کریں اور 3 سے 4 منٹ تک پکائیں جب تک کہ تیل دوبارہ سطح پر نہ آجائے۔
لیجیے مزیدار چٹ پٹی گریوی تیار ہے. اب اس سالن کو محفوظ کرلیں اور روز نت نئی ڈشز منٹوں میں تیار کر کے سب کو حیران کردیں.