بازار میں ملنے والے پانی کے پکوڑے تو یقیناً آپ سب نے ہی کھائے ہونگے اور ساتھ ہی گول گپے بھی، پر کیا آپ نے کبھی ان کو آپس میں ملا کر کھانے کے بارے میں سوچا ہے؟ اگر نہیں تو آج کی ڈش آپ کیلیئے ہی ہے۔ کیونکہ ہم آپ کو ایک نئے انداز میں پانی کے پکوڑے بنانا سیکھا رہے ہیں جو بہت ہی چٹخارے دار اور مزیدار ہونگے۔

پکوڑے بنانے کیلیئے:

2 کپ بیسن میں اجوائن 2 چٹکی، پسا ہوا زیرہ ½ چمچ، ہلدی ½ چمچ، پسا ہوا دھنیا 1 چمچ اور نمک حسبِ ذائقہ ڈال کر 1 کپ پانی (حسبِ مقدار) شامل کر کے گھول کر بیسن کا بیٹر تیار کرلیں۔ اور اسے 5 سے 7 منٹ ڈھک کر رکھنے کے بعد اس میں میٹھا سوڈا ڈال کر اچھے سے مکس کریں

۔ اب درمیانی آنچ پر تیل گرم کریں اور چمچ کی مدد سے اس میں پکوڑے کا بیٹر ڈالتے جائیں، کوشش کیجیئے گا کہ سارے پکوڑے تقریباً ایک جیسی شکل کے بنیں۔ گولڈن براؤن ہونے پر انہیں ایک پلیٹ میں نکال کر رکھ دیں

پکوڑے کا پانی بنانے کیلیئے:

۔ پکوڑے کا چٹ پٹا پانی بنانے کیلیئے ایک پیالے میں 1 چمچ املی بھگو کر رکھ دیں، اور تھوڑی دیر بعد اس میں سے بیج نکال کر گودا علیحدہ کردیں

۔ اب ڈنڈے کونڈے (ہاون دستہ) میں تھوڑا سا ہرا دھنیا، پودینہ اور 4 عدد ہری مرچوں کو کاٹ کر ڈالیں اور اچھے سے پیس لیں۔ پیسنے کے بعد اسے املی کے پانی میں شامل کردیں

۔ املی پانی کو ایک بڑے پیالے میں ڈال کر اس میں تھوڑا سادہ پانی شامل کریں، اور ساتھ ہی 1 چمچ نمک، ½ چمچ (لال مرچ، چاٹ مصالحہ اور زیرہ پاؤڈر)، گول کٹی ہوئی پیاز اور دھنیا پودینے کے پتّے ڈال کر مکس کریں

پانی کے پکوڑے:

آخر میں اس چٹ پٹے پانی میں ایک لیموں نچوڑ کر اس میں پکوڑے شامل کرتے جائیں، تھوڑی دیر بھیگنے کے بعد آپ کے مزیدار اور چٹخارے دار پانی کے پکوڑے تیار ہیں۔