موسم میں خنکی آتے ہی مونگ پھلی اور گجک کی فروخت میں اضافہ ہوجاتا ہے، کیونکہ اسے بہت شوق سے کھایا جاتا ہے اور اسکے بغیر سردیوں کو ادھورہ تصور کیا جاتا ہے۔ کچھ لوگ بازار سے لینے کے بجائے گھر میں گجک/ چِکّی بنا کر کھاتے ہیں، اسکی خاص بات یہ ہے کہ 10 منٹ میں تیار ہوجاتی ہے لیکن گھر میں اکثر یہ بنانے کے بعد نرم اور چپچپی ہوجاتی ہے اور خستہ نہیں بنتی۔
جو خواتین گھر میں چِکّی بنانے کا شوق رکھتی ہیں یہ ریسیپی خاص ان کے لیئے ہے
ترکیب:
۔ سب سے پہلے آپ کو ایک پلیٹ گُڑ لینا ہے اور اسے چھوٹے ٹکڑوں میں توڑ لینا ہے ڈنڈے کی مدد سے
۔ اب آپ کو ایک پلیٹ مونگ پھلی لینی ہے اور اسے ایک سے دیڑھ منٹ تک توّے پر روسٹ کر لینا ہے
۔ پھلی روسٹ کرنے کے بعد اسے ایک کپڑے میں رکھ کر بیلن اس پر چلائیں، اس سے چھلکے بھی آسانی سے اُتر جاتے ہیں اور پھلیاں دو حصوں میں الگ ہوجائیں گی
۔ اب ایک پین میں گُڑ ڈال کر ہلکی آنچ پر اسے پکائیں، اس میں تھوڑا سا پانی بھی شامل کرلیں تا کہ گُڑ اچھے سے پگھل جائے
۔ گُڑ کو پکانے کے دوران ہر تھوڑی دیر میں کچھ قطرے ٹھنڈے پانی میں ڈال کر چیک کرتے جائیں، جب پانی میں ڈالا ہوا قطرہ کڑک ہوجائے اس وقت فوراً چولہا بند کردیں
۔ چولہا بند کرکے اس میں مونگ پھلی ڈالیں اور چمچ سے اچھے سے مکس کرلیں
۔ اب بٹر پیپر لے کر اس پر گھی لگائیں اور اس مکسچر کو اس پر ڈال کر دوسرا پیپر اوپر رکھیں اور بیلن سے بیل دیں
۔ اسکے بعد پیپر ہٹا کر اسے چھری سے کاٹ لیں، مزیدار اور خستہ گّجک تیار ہے