رمضان آتے ہی بیکریوں پر کھجلا پھینی کے ڈھیر لگ جاتے ہیں، اور لوگ بھی شوق سے اسے خرید کر گھر لے جاتے ہیں، کیونکہ بہت سے ایسے لوگ ہیں جو اسے سحری میں کھانا پسند کرتے ہیں خاص کر بزرگ یا چھوٹی عمر کے بچے۔

لیکن جس حساب سے ملک میں مہنگائی کا طوفان آیا ہے ایسے میں یہ ساری چیزیں بھی اسکی لپیٹ میں آگئی ہیں اور پچھلے سال کے مقابلے کھجلا پھینی کی قیمت میں بھی اضافہ ہوگیا ہے۔

اسلیئے آج ہم آپ کو گھر میں ہی پھینی بنانے کی ترکیب بتانے جارہے ہیں، جس سے آپ کے اضافی پیسے بھی بچیں گے اور آپ اپنی مرضی کے مطابق جتنی چاہیئں اتنی بنا کے کھا اور کھلا سکتی ہیں۔

پھینی بنانے کیلیئے درکار اجزاء:

۔ گھی آدھا کلو

۔ میدہ آدھا کلو

۔ پانی ایک کپ یا حسبِ ضرورت

۔ تیل فرائی کرنے کے لئے

پھینی بنانے کی ترکیب:

گھی کو فرائی پین میں دس منٹ گرم کریں۔ پھر ایک گھنٹہ اسے ٹھنڈا ہونے کے لئے چھوڑ دیں تاکہ مکھن تیار ہوجائے، ٹھنڈا ہونے کے بعد اس میں 2 چمچ کارن فلور شامل کر کے مکس کرلیں (نوٹ: اگر مکھن سخت ہوجائے تو تھوڑا تیل ڈال کر مکھن کو نرم کر لیں)۔

ڈو بنانے کے لئے میدے میں ایک کپ پانی ڈال کر ڈو گوندھ لیں۔ پانی کم یا زیادہ استعمال کیا جاسکتا ہے، بس ڈو کو نرم ہونا چاہیے۔ ڈو کو ہاتھوں کی مدد سے گولائی میں ڈونٹ کی شکل دیں پھر اس پر مکھن لگائیں اور بیس منٹ کے لئے چھوڑ دیں۔

پھر اسے ہاتھوں سےگولائی میں کھینچتے چلے جائیں، ایک بار کرنے کے بعد اس پر گھی لگا کے 10 منٹ چھوڑ دیں اور اسکے بعد موڑ کر دوبارہ یہی کریں۔ طریقہ کار اوپر ویڈیو میں دیا ہوا ہے۔ آخر میں کڑاہی میں تیل گرم کرکے اس میں پھینی ڈال کر فرائی کرلیں۔ لیجیے پھینی گرما گرم دودھ میں کھانے کے لیے تیار ہے۔