ٹاٹری کا سائنسی نام سٹرک ایسڈ ہے اور یہ عام طور پر ہر گھر میں پائی جاتی ہے کیونکہ اسے مختلف کھانوں کو لمبے عرصے کے لیے قابل استعمال رکھنے کے لیے استعمال کیا جاتا ہے، اسے خاص طور پر جام، مشروبات، سوڈا، کینڈیز، آئس کریم اور فروزن کھانوں میں استعمال کیا جاتا ہے۔ اس ایسڈ کو قلمی اور پاوڈر کی شکل میں بازار میں فروخت کیا جاتا ہے جسے ہم ٹاٹری کہتے ہیں اور انگلش میں اسے سور سالٹ، لیمن سالٹ جیسے ناموں سے پُکارا جاتا ہے۔
لیکن کیا آپ جانتے ہیں اس کے اور بھی کئی فائدے ہیں؟ اگر نہیں جانتے تو آج ہم آپ کو بتائیں گے ٹاٹری کا وہ استعمال جو آپ کی کئی گھریلو مشکلات کو آسان کر سکتا ہے۔
کپڑوں کے داغ:
ٹاٹری پاؤڈر کو پانی میں ڈال کر اس میں کپڑوں کو ایک گھنٹا بھگا کر رکھنے سے اس پہ لگے ضدی داغ نکل جاتے ہیں
جلے برتن:
جلے ہوئے برتنوں کو صاف کرنے کیلیئے، ایک دیگچی میں 1 کپ پانی اور 1 چمچ ٹاٹری پاؤڈر ڈال کر ابال لیں اور پھر اس میں 2 چمچ میٹھا سوڈا، 1 چمچ سرکہ، 2 چمچ لیموں کا رس اور ½ چمچ برتن دھونے والا ڈٹرجن شامل کریں۔ اب اس مکسچر کو جلے ہوئے برتنوں پر لگائیں اور صاف کریں، داغ اور چکنائی دونوں نکل جائے گی۔
چولہے اور فرش پر جمی ہوئی چکنائی:
2 چمچ بیکنگ سوڈا، 1 چمچ ٹاٹری پاؤڈر، 1 چمچ نمک اور لیموں کے رس کو ملا کر پیسٹ بنا لیں اور اسے چولہے اور فرش پر جمی چکنائی پر لگا کے رگڑیں، آپ دیکھیں گے کہ کیسے آپکا فرش اور چولہا چمک جائے گا۔
توّا صاف کرنے کیلیئے:
توّے پر جمی چکنائی اور کالک صاف کرنے کا آسان حل یہ ہے کہ، توّے پر 1 چمچنمک، 1 چمچ بیکنگ سوڈا اور 1 چمچ ٹاٹری پاؤڈر ڈال کر آلو کو بیچ سے آدھا کاٹیں اور کٹی ہوئی سائیڈ سے اسے اچھے سے رگڑیں۔ اس سے آپ کا تّوا صاف ہوجائے گا۔