آج کل باورچی خانوں اور گھر کے مختلف حصوں میں چھوٹے بڑے لال بیگوں کی بھرمار ہوگئی ہے. چند سال پہلے مرحومہ زبیدہ طارق نے ان ننھے کیڑے مکوڑوں کو ختم کرنے کا طریقہ بتایا تھا جوآج ہم آپ کو بتا رہے ہیں.
زبیدہ طارق کا کہنا تھا کہ ایک بڑے سے پتیلے میں برتن دھونے والا صابن ڈالیں اور پانی میں ابال کر گھلا لیں. اس پانی کو گھر کی تمام نالیوں اور بیسن وغیرہ میں ڈال دیں.
دوسری طرف باورچی خانہ پوری طرح خالی کرلیں اور کیڑے مار اسپرے چھڑک کر چھوڑ دیں. اگلے دن صفائی کرلیں.
ایک دیگچی میں پانی میں سرکہ اور اچھا والا سرف ڈال کر تولیہ سے کیبنٹ وغیرہ صاف کریں. اسفنج کا استعمال نہیں کرنا.
ایک پیالی آٹا، آدھی پیالی بورک پاؤڈر اور آدھی پیالی چینی ملا کر پانی ڈال کر موٹا لیپ بنا کر کیبنٹس اور دیوار کے کناروں پر لگائیں. گولیاں بنا کر رکھ دیں. کیبنٹس اور شیلفس پر براؤن پیپر بچھا کر سامان رکھیں. اخبار کا استعمال ہر گز نہ کریں.