ملتان: پاکستان کرکٹ ٹیم نے 3 ایک روزہ میچوں کی سیریز کے پہلے میچ میں ویسٹ انڈیز کو5 وکٹوں سے شکست دے دی۔
کپتان بابر اعظم کے 103 اور امام الحق کے 65 رنز کی بدولت ملتان کرکٹ اسٹیڈیم میں کھیلے گئے میچ میں پاکستان نے 306 رنز کا ہدف 5 وکٹوں کے نقصان پر چار گیندیں قبل پورا کرلیا۔
ویسٹ انڈیز نے پہلے بیٹنگ کرتے ہوئے 8 وکٹوں کے نقصان پر جیت کیلئے شاہینوں کو 306 رنز کا بڑا ہدف دیا تھا جس میں ویسٹ انڈین اوپنر شائے ہوپ کے 127 رنز بھی شامل ہیں۔
پاکستان کی جانب سے حارث رؤف نے 4، شاہین آفریدی نے 2 جب کہ محمد نواز اور شاداب خان نے ایک ایک وکٹ حاصل کی۔
306رنز کے ہدف کے تعاقب میں پاکستان کی پہلی وکٹ 26 رنز پر گری جب فخر زمان 11 رنز کیچ آؤٹ ہوئے جب کہ امام الحق نے ٹیم کے مجموعی اسکور میں 65 رنز کا اضافہ کیا اور 129 کے مجموعے پر پویلین لوٹ گئے۔
کپتان بابر اعظم نے شاندار کارکردگی کا مظاہرہ کرتے ہوئے 103 رنز کی ناقابل شکست اننگز کھیلی اور جوزف کی گیند پر میئر کو کیچ دے بیٹھے جبکہ محمد رضوان ٹیم کے مجموعے میں 59 رنز کا اضافہ کرکے آؤٹ ہوگئے۔
شاداب خان 6 رنز پر جوزف کا شکار بنے، 256 رنز پر 4 وکٹیں کھونے کے بعد خوشدل شاہ نے 23 گیندوں پر 41 رنز کی جارحانہ اننگز کھیلی اور قومی ٹیم کو فتح دلادی۔ خوشدل شاہ نے 41 رنز جب کہ محمد نواز 8 بناکر ناٹ آؤٹ رہے۔
دونوں ٹیموں کے درمیان تین ایک روزہ میچوں کی سیریز کا دوسرا میچ 10 اور تیسرا 12 جون کو کھیلا جائے گا۔