آئی سی سی ورلڈ ٹیسٹ چیمپئن شپ کے فائنل میں آسٹریلیا کے ہاتھوں شکست پر سابق انگلش کپتان ناصر حسین نے بھارتی بیٹرز کو بابر اعظم اور کین ولیمسن سے بیٹنگ کے گر سیکھنے کا مشورہ دے دیا۔
ایک سپورٹس چینل سے گفتگو کرتے ہوئے انہوں نے کہا کہ روہت شرما اور شبمان گل پر مشتمل بھارتی ٹاپ آرڈر بلے بازوں کو پاکستان کے بابر اعظم اور نیوزی لینڈ کے کین ولیمسن سے سیکھنا چاہیئے کہ سوئنگ اور سیم ہوتی گیندوں کو کس طرح کھیلا جاتا ہے ۔
ان کا کہنا تھا کہ ورلڈ ٹیسٹ چیمپئن شپ کے فائنل میں بھارت کے سینیئر بلے بازوں کا کھیل دیکھ کر مجھے بہت مایوسی ہوئی، میرے کمنٹس پر بھارتی مداح تنقید تو کریں گے لیکن میں پھر بھی کہوں گا کہ ہندوستانی بیٹرز کو بابر اعظم اور کین ولیمسن کی بیٹنگ دیکھ کر سیکھنا چاہیئے کہ جب گیند سوئنگ اور سیم ہورہی ہو تو کیسے کھیلا جاتا ہے۔
سابق برطانوی کپتان اور بلے باز کا کہنا تھا کہ بابر اور ولیمسن کی کامیابی کی وجہ یہ ہے کہ وہ سوئنگ ہوتی گیند کو کھیلنے میں جلدی نہیں کرتے بلکہ جتنا ہوسکے لیٹ کھیلتے ہیں۔