پاکستان کرکٹ بورڈ کی مینجمنٹ کمیٹی کے چیئرمین ذکا اشرف نے قومی کرکٹ ٹیم کے سابق کپتان محمد حفیظ کو بورڈ کے نئے سیٹ اپ میں اہم ذمہ داری سونپنے کا فیصلہ کرلیا۔
چیئرمین ذکا اشرف سے محمد حفیظ نے ملاقات کی،ملاقات میں محمد حفیظ نے ذکا اشرف کو چیئرمین مینجمنٹ کمیٹی بننے پر مبارکباد دی، اس موقع پر ذرائع کا کہنا ہے کہ ذکا اشرف نے محمد حفیظ کو چیف سلیکٹر کے عہدے کی پیشکش کردی۔
اس حوالے سے سابق کپتان محمد حفیظ کا کہنا تھا کہ ذکا اشرف اچھے ایڈمنسٹریٹر ہیں، ان کی دل سے عزت کرتا ہوں۔کرکٹ کی بہتری کےلیے اچھی آفر آئی تو ضرور قبول کروں گا۔
باخبر ذرائع کا کہنا ہے کہ پی سی بی کے نئے سیٹ اپ میں سابق کپتان یونس خان اور سلیم یوسف کے علاوہ محسن حسن خان کو بھی سلیکشن کمیٹی میں ذمہ داری ملنے کا امکان ہے، پی سی بی سیٹ اپ میں شعیب اختر کوبھی شامل کرنے پر بات ہورہی ہے۔
یاد رہے کہ نجم سیٹھی کے بعد ذکا اشرف نے ایک بار پھر پاکستان کرکٹ بورڈ کا انتظام سنبھال لیا ہے اور نئے سیٹ اپ میں سابق کھلاڑیوں کو اہم ذمہ داریاں دینے کی تیاریاں کی جارہی ہیں۔