انڈین نژاد امریکی کاروباری شخصیت موہک نہتا نے فرانس کے دارالحکومت پیرس میں جاری اولمپکس مقابلوں کے حوالے سے ایک دلچسپ اعلان کیا ہے۔
ٹائمز آف انڈیا کے مطابق ویزہ سٹارٹ اپ کے سی ای او موہک نہتا نے اعلان کیا کہ اگر اولمپکس میں نیرج چوپڑا نے گولڈ میڈل جیتا تو وہ سب کو فری ویزہ سروس فراہم کریں گے۔
ایٹلس نامی سٹارٹ اپ کے بانی موہک نہتا نے لنکڈ اِن پر اپنی پوسٹ میں نیرج چوپڑا کے گولڈ میڈل جیتنے کی صورت میں سب کو مفت ویزہ سروس دینے کا اعلان کیا جو سوشل میڈیا پر وائرل ہے۔
اگر نیرج چوپڑا نیزہ بازی کے مقابلے میں سونے کا تمغہ جیتتے ہیں تو ایٹلس اپنے صارفین کو ایک دن کے لیے فری ویزہ سروس دے گی یعنی ان سے کوئی فیس نہیں لی جائے گی۔
اپنی پوسٹ میں موہک نہتا نے لکھا کہ ’نیرج چوپڑا کے سونے کا تمغہ جیتنے کی صورت میں میں ذاتی طور پر سب کو مفت ویزہ دوں گا۔‘
موہک نہتا نے واضح کیا کہ کسی بھی ملک سے تعلق رکھنے والے افراد اس آفر سے مستفید ہو سکتے ہیں اور کوئی فیس ادا کیے بغیر کسی بھی ملک کے ویزا کے لیے مفت سروس حاصل کر سکتے ہیں۔
خیال رہے کہ پیرس اولمپکس میں نیزہ بازی کے مقابلے 6 اگست سے شروع ہوں گے۔
اس مقابلے میں انڈیا کے نیرج چوپڑا اور اُن کے پاکستانی روایتی حریف ارشد ندیم سمیت دنیا کے مختلف ممالک سے 31 ایتھلیٹ حصہ لیں گے۔