پشاور میں فائرنگ ، انچارج شعبہ تفتیش سمیت 3 افراد جاں بحق

image

پشاور میں تھانہ مچنی گیٹ کی حدود میں فائرنگ کے افسوسناک واقعے میں شعبہ تفتیش کے انچارج انسپکٹر علی حسین سمیت تین افراد جان کی بازی ہار گئے۔ واقعہ دارمنگی کے علاقے میں پیش آیا جہاں نامعلوم ملزمان نے ایک گاڑی پر اندھا دھند فائرنگ کر دی۔

پولیس کے مطابق انسپکٹر علی حسین دو شہریوں واجد ولد منصف اور عظمت کے ہمراہ ایک ہی گاڑی میں جا رہے تھے کہ اس دوران تین موٹرسائیکلوں پر سوار نامعلوم مسلح افراد نے کلاشنکوف اور پستول سے فائرنگ کر دی جس کے نتیجے میں تینوں افراد موقع پر ہی جاں بحق ہو گئے۔

واقعے کی اطلاع ملتے ہی ایس پی سجاد حسین، ڈی ایس پی ورسک سرکل ارباب نعیم حیدر اور ایس ایچ او تھانہ مچنی گیٹ مدثر حیات پولیس نفری کے ہمراہ فوری طور پر جائے وقوعہ پر پہنچے اور نعشوں کو پوسٹ مارٹم کے لیے ہسپتال منتقل کیا گیا۔

پولیس نے جائے وقوعہ سے اہم شواہد اکٹھے کر لیے ہیں اور واقعے کی مختلف پہلوؤں سے تفتیش شروع کر دی ہے۔ ملزمان کی شناخت اور گرفتاری کے لیے علاقے میں سرچ آپریشن کا آغاز کر دیا گیا ہے۔


Meta Urdu News: This news section is a part of the largest Urdu News aggregator that provides access to over 15 leading sources of Urdu News and search facility of archived news since 2008.

Follow US