خیبر پختونخوا کے مرکزی شہر پشاور میں قتل و غارت اور بچوں سے زیادتی کے واقعات میں تشویشناک اضافہ سامنے آیا، ایک ہفتے کے دوران مختلف علاقوں میں 13 سے زائد افراد قتل کیے گئے۔
صوبائی دارالحکومت پشاور میں قتل و غارت گری اور بچوں سے زیادتی کے واقعات خطرناک تک بڑھ گئے، گزشتہ ایک ہفتے کے دوران شہر کے مختلف تھانوں کی حدود میں 13 سے زائد افراد کو موت کے گھاٹ اتارا گیا جن میں خواتین بھی شامل ہیں۔
اسی طرح تین الگ الگ واقعات میں بچوں سے زیادتی کی رپورٹس بھی سامنے آئی ہیں۔ شہر پشاور کا امن و امان مکمل طور پر بگڑ چکا ہے جبکہ پولیس کی کمان کمزور پڑتی جا رہی ہے اور تھانے مسائلستان بن گئے ہیں۔
دوسری جانب پولیس اپنی ناکامی کو چھپانے کے لیے ایف آئی آر کے اندراج میں رکاوٹ بھی سنگین مسئلہ کی صورت اختیار کرچکا ہے جبکہ آئے روز پولیس تشدد، بدسلوکی اور بدعنوانی کے واقعات بھی رپورٹ ہو رہے ہیں۔