کیمبرج اسیسمنٹ انٹرنیشنل ایجوکیشن نے پاکستانی طلبہ کے لیے پہلی بار ان کی امتحانی جوابی کاپیاں دکھانے کا سلسلہ شروع کر دیا ہے۔ اس اقدام کا مقصد امتحانی نظام میں شفافیت لانا اور طلبہ کو اپنی کارکردگی کے جائزے کا موقع دینا ہے۔
کیمبرج کی کنٹری ڈائریکٹر عظمیٰ یوسف نے دورہ کراچی کے دوران میڈیا نمائندوں کو بتایا کہ طلبہ اب آن لائن اپنی امتحانی کاپی دیکھ سکیں گے اور اس کے بعد اگر وہ چاہیں تو اسکروٹنی کے لیے فیصلہ کر سکیں گے۔ یہ سہولت مکمل طور پر مفت ہے اور اس کے لیے کوئی چارجز وصول نہیں کیے جائیں گے۔
ان کا کہنا تھا کہ کیمبرج سے وابستہ تمام اسکولوں کو طلبہ کی آنسر اسکرپٹس تک رسائی دے دی گئی ہے۔ اب جو طالب علم چاہے اپنی کاپی اسکول کے ذریعے دیکھ سکتا ہے۔
عظمیٰ یوسف نے مزید بتایا کہ اے اور او لیول کی سطح پر دنیا بھر میں سب سے زیادہ کیمبرج کے طلبہ پاکستان میں انرول ہیں جن کی تعداد ایک لاکھ 30 ہزار تک جا پہنچی ہے۔ پاکستان میں اس وقت 800 کے قریب اسکول کیمبرج سے وابستہ ہیں جبکہ امریکا دوسرے نمبر پر ہے۔
عظمیٰ یوسف نے مزید کہا کہ کیمبرج کا نصاب مختصر اور مقصدی ہے جس سے طلبہ پر غیر ضروری بوجھ کم ہوتا ہے اور وہ صرف وہی مواد پڑھتے ہیں جو واقعی اہمیت رکھتا ہے۔