لاہور بورڈ آف انٹرمیڈیٹ اینڈ سیکنڈری ایجوکیشن نے میٹرک اور انٹرمیڈیٹ کے طلبہ کے لیے ڈیجیٹل رزلٹ کارڈ سسٹم نافذ کرنے کا فیصلہ کرلیا ہے، جس کا آغاز 2026 کے سالانہ امتحانات کے نتائج سے کیا جائے گا۔
نئے نظام کے تحت ریگولر اور پرائیویٹ دونوں امیدواروں کو پی ڈی ایف فارمیٹ میں ڈیجیٹل رزلٹ کارڈ جاری کیے جائیں گے۔ ریگولر طلبہ اپنے متعلقہ تعلیمی اداروں کے آن لائن پورٹل سے جبکہ پرائیویٹ امیدوار لاہور بورڈ کے آن لائن پورٹل سے اپنے رزلٹ کارڈ ڈاؤن لوڈ کرسکیں گے۔
وزیر تعلیم پنجاب رانا سکندر حیات نے کہا ہے کہ ڈیجیٹل رزلٹ کارڈ میں کیو آر کوڈ سمیت تمام جدید سیکیورٹی فیچرز شامل ہوں گے، جبکہ اسے اصل رزلٹ کارڈ کے مساوی قانونی حیثیت حاصل ہوگی۔ ان کے مطابق یہ رزلٹ کارڈ داخلوں، ملازمت، اسکالرشپ، تصدیق اور مساوات سمیت تمام سرکاری و تعلیمی مقاصد کے لیے قابل قبول ہوگا۔
انہوں نے بتایا کہ تمام تعلیمی اداروں کو ہدایت جاری کر دی گئی ہے کہ وہ ڈیجیٹل رزلٹ کارڈ 100 گرام رنگین کاغذ پر پرنٹ کرکے طلبہ کے حوالے کریں۔
وزیر تعلیم نے واضح کیا کہ تمام سرکاری اور نجی ادارے ڈیجیٹل رزلٹ کارڈ کو بغیر کسی اعتراض کے سرکاری اور تعلیمی مقاصد کے لیے تسلیم کریں گے۔