قومی ٹی ٹونٹی کرکٹ ٹیم کے کپتان سلمان علی آغا کی قیادت اور فارم کو لے کر قومی سلیکٹرز اور ہیڈ کوچ مائیک ہیسن نے پاکستان کرکٹ بورڈ کے سامنے موقف اختیار کیا ہے کہ کپتانی میں تبدیلی کا وقت نہیں ہے۔
ذرائع کے مطابق بعض حلقے سلمان علی آغا کو ٹی ٹونٹی ٹیم سے ہٹانے اور شاہین شاہ آفریدی کو دوبارہ کپتان بنانے کے لیے دباؤ ڈال رہے تھے جبکہ بابر اعظم کی واپسی کے لیے بھی کوششیں کی جا رہی تھیں۔
تاہم قومی سلیکٹرز عاقب جاوید، علیم ڈار، اظہر علی اور اسد شفیق اور ہیڈ کوچ مائیک ہیسن اس بات پر متفق ہیں کہ ٹی ٹونٹی ورلڈ کپ سے پہلے کپتانی میں تبدیلی درست فیصلہ نہیں ہوگا۔
ذرائع کا کہنا ہے کہ سلمان علی آغا کی کپتانی میں ٹیم نے 30 میچز میں سے 17 جیتے ہیں حالیہ شارجہ ٹرائی سیریز میں فائنل تک رسائی حاصل کی اور سلمان علی آغا نے بھی بہترین بیٹنگ کی جبکہ ایشیا کپ میں ان کی فارم خراب تھی جسے سلیکٹرز ٹیم کی مجموعی کارکردگی کے ساتھ دیکھ رہے ہیں۔
سلیکٹرز اور ہیڈ کوچ نے بھارتی کپتان سوریا کمار یادو اور دیگر کھلاڑیوں کی مثالیں دیتے ہوئے کہا کہ فارم میں کمی کسی کھلاڑی کو باہر کرنے کی بنیاد نہیں بنتی۔
ذرائع کے مطابق چند دنوں میں حتمی فیصلہ لیا جائے گا کہ آیا سلمان علی آغا کپتان رہیں گے یا کوئی تبدیلی کی جائے۔ چیئرمین بھی اس بات کے حق میں نہیں کہ چند میچز یا ٹورنامنٹ کی بنیاد پر ٹیم میں مسلسل تبدیلیاں کی جائیں۔