پاکستان کے عالمی شہرت یافتہ مارشل آرٹسٹ عرفان محسود نے ایک اور نیا گینیز ورلڈ ریکارڈ اپنے نام کر کے ملک و قوم کا نام روشن کر دیا۔
عرفان محسود نے ناروے کے ایتھلیٹ سیور دائرسن کا ریکارڈ توڑتے ہوئے ایک منٹ میں 80 پاؤنڈ وزن کے ساتھ 42 فنگر ٹیپ پش اپس مکمل کر کے نیا عالمی ریکارڈ قائم کر دیا۔ اس سے قبل ناروے کے سیور دائرسن نے ایک منٹ میں 38 فنگر ٹیپ پش اپس کر کے یہ اعزاز حاصل کیا تھا۔
عرفان محسود نے صرف 9 سال کے قلیل عرصے میں 150 گینیز ورلڈ ریکارڈز قائم کر کے تاریخ رقم کی ہے، اور وہ اس کارنامے کو انجام دینے والے پہلے پاکستانی بن گئے ہیں۔
مارشل آرٹسٹ عرفان محسود پش اپس کیٹیگری میں بھی عالمی سطح پر نمایاں ہیں، جہاں وہ 70 سے زائد ریکارڈز بنا چکے ہیں۔ انہوں نے 100 پاؤنڈ، 80 پاؤنڈ، 60 پاؤنڈ اور 40 پاؤنڈ وزن کے ساتھ کیے جانے والے پش اپس میں بھی سب سے زیادہ ریکارڈ اپنے نام کیے ہیں۔
عرفان محسود نے صرف پش اپس ہی نہیں بلکہ مارشل پش اپس، اسکواٹس، جمپنگ جیکس، اسٹیپ اپس، نی اسٹرائکس، ایلبو اسٹرائکس، سائڈ جمپس، ہائی جمپس اور اسٹار جمپس جیسے مختلف شعبوں میں بھی متعدد عالمی ریکارڈ قائم کیے ہیں۔
قابل ذکر بات یہ ہے کہ عرفان محسود اب تک 20 ممالک کے ایتھلیٹس کے ورلڈ ریکارڈز توڑ چکے ہیں جن میں امریکا، برطانیہ، بھارت، چین، ناروے، جرمنی، فرانس، فن لینڈ، فلپائن، اسپین، اٹلی، لبنان، مصر، عراق، پاکستان اور شام شامل ہیں۔
مزید برآں، عرفان محسود کے زیر تربیت 20 شاگرد بھی گینیز ورلڈ ریکارڈز حاصل کر چکے ہیں، جو ان کے شاندار کوچنگ معیار اور محنت کی عکاسی کرتا ہے۔
عرفان محسود کی شاندار کارکردگی کے اعتراف میں انہیں 2023 میں صدارتی ایوارڈ برائے حسنِ کارکردگی سے بھی نوازا جا چکا ہے۔
عرفان محسود نے اپنے تازہ ریکارڈ کے بعد کہا کہ میرا مقصد دنیا کو یہ دکھانا ہے کہ پاکستانی نوجوان محنت، لگن اور جذبے سے دنیا میں کسی سے کم نہیں۔