آسٹریلیا کے سابق آل راؤنڈر شین واٹسن نے میجر لیگ کرکٹ (ایم ایل سی) کی فرنچائز سان فرانسسکو یونیکورنز کے ہیڈ کوچ کے عہدے سے تین سال بعد علیحدگی اختیار کرلی ہے۔
کرکٹ ویب سائٹ کے مطابق سان فرانسسکو یونیکورنز فرنچائز نے ابھی تک نئے کوچ کے نام کا اعلان نہیں کیا۔ ایک بیان میں سان فرانسسکو یونیکورنز نے کہا کہ ٹیم اب سال بھر جاری رہنے والے کوچنگ ماڈل کی طرف منتقل ہو رہی ہے۔
فرنچائز نے بتایا کہ 44 سالہ شین واٹسن اپنی کمنٹری ذمہ داریوں اور کوچنگ برانڈ بی آن پرفارمنس میں مصروف ہونے کے باعث مکمل وقت نہیں دے سکتے۔
یاد رہے کہ سابق مایہ ناز آل رائونڈر شین واٹسن کی قیادت میں سان فرانسسکو یونیکورنز نے 2023 میں لیگ کے پہلے سیزن میں 6 ٹیموں میں پانچواں مقام حاصل کیا جبکہ 2024 اور 2025 میں لگاتار پلے آف میں جگہ بنائی۔ ان کی بہترین کارکردگی 2024 میں رہی، جب ٹیم واشنگٹن فریڈم سے فائنل میں شکست کھا گئی۔
شین واٹسن نے اپنے بیان میں کہاکہ سان فرانسسکو یونیکورنز کی کوچنگ میرے لیے ایک اعزاز تھی۔ تین سیزنز میں جو کچھ ہم نے حاصل کیا، اس پر مجھے فخر ہے۔ ایم ایل سی نے کرکٹ کے لیے ایک نیا اور پرجوش باب کھولا ہے۔
شین واٹسن اس سے قبل دیگر فرنچائز لیگوں میں بھی خدمات انجام دے چکے ہیں۔ وہ انڈین پریمیئر لیگ (آئی پی ایل) میں دہلی کیپیٹلز کے اسسٹنٹ کوچ (2022-23) اور پاکستان سپر لیگ (پی ایس ایل) میں کوئٹہ گلیڈی ایٹرز کے ہیڈ کوچ (2024) میں رہ چکے ہیں۔
سان فرانسسکو یونیکورنز کے سی ای او ڈیوڈ وائٹ نے کہا کہ شین واٹسن ہمارے پہلے ہیڈ کوچ کے طور پر فطری انتخاب تھے۔ انہوں نے ٹیم کی بنیاد رکھنے اور اسے آگے بڑھانے میں کلیدی کردار ادا کیا۔ ہم ان کی خدمات کے شکر گزار ہیں اور ان کے مستقبل کے لیے نیک خواہشات رکھتے ہیں۔