پاکستان اور جنوبی افریقہ کی کرکٹ ٹیموں کے درمیان تین ٹی 20 انٹرنیشنل میچز کی سیریز کا آغاز (کل) بروز منگل راولپنڈی کرکٹ اسٹیڈیم میں ہوگا۔
سیریز کا پہلا میچ مقامی وقت کے مطابق رات 8 بجے شروع ہوگا۔ دونوں ٹیموں نے اس اہم مقابلے کے لیے بھرپور تیاری مکمل کرلی ہے اور شائقین کرکٹ کو ایک سنسنی خیز میچ دیکھنے کی توقع ہے۔
پاکستان ٹیم کی قیادت آل راؤنڈر سلمان علی آغا کریں گے۔ اسکواڈ میں شامل دیگر کھلاڑیوں میں بابر اعظم، عبدالصمد، شاہین شاہ آفریدی، نسیم شاہ، صائم ایوب، عثمان خان، محمد نواز، محمد وسیم، فہیم اشرف، حسن نواز، صاحبزادہ فرحان، سلمان مرزا، ابرار احمد، عثمان خان اور عثمان طارق شامل ہیں۔ مایہ ناز بیٹر بابر اعظم کی ٹی 20 اسکواڈ میں واپسی ہوئی ہے۔
پاکستان وائٹ بال ٹیم کے ہیڈ کوچ مائیک ہیسن کا کہنا ہے کہ بابر اعظم تجربہ کار بیٹر ہیں جو ٹیم کے لیے اہم کردار ادا کریں گے۔ بابر اعظم اس وقت ایک اہم سنگ میل کے قریب ہیں۔ انہیں بھارت کے روہت شرما کا ٹی 20 انٹرنیشنل کرکٹ میں سب سے زیادہ رنز بنانے کا ریکارڈ توڑنے کے لیے صرف 9 رنز درکار ہیں۔ روہیت شرما نے 159 میچوں میں 4,231 رنز بنائے ہیں جبکہ بابر اعظم 128 میچوں میں 4,223 رنز کے ساتھ دوسرے نمبر پر ہیں۔
دوسری جانب جنوبی افریقہ کی قیادت ڈونوون فریرا کریں گے۔ اسکواڈ میں اوٹنیل بارٹمین، کوربن بوش، میتھیو بریٹزکے، ڈیوالڈ بریوس، نانڈرے برگر، کوئنٹن ڈی کوک، ٹونی ڈے زورزی، ریزا ہینڈرکس، جارج لنڈے، لنگی نگیدی، انکابایومزی پیٹر، لوان ڈرے پریٹوریئس، اینڈائل سیمیلانے اور لیزاد ولیمز شامل ہیں۔
دونوں ٹیموں کے درمیان سیریز کے آغاز پر شائقین کرکٹ میں زبردست جوش و خروش پایا جا رہا ہے اور راولپنڈی اسٹیڈیم میں بڑی تعداد میں تماشائیوں کی آمد متوقع ہے۔ ضلعی انتظامیہ اور پولیس کی جانب سے سیکیورٹی کے سخت انتظامات مکمل کرلیے گئے ہیں تاکہ شائقین کرکٹ پرامن اور خوشگوار ماحول میں میچ سے لطف اندوز ہوسکیں۔