اینٹی نارکوٹکس فورس نے ملک کے مختلف شہروں میں منشیات فروشوں کے خلاف بڑے پیمانے پر کریک ڈاؤن کرتے ہوئے 3 کارروائیوں میں 3 ملزمان کو گرفتار کر لیا۔ کارروائیوں کے دوران مجموعی طور پر 249.31 کلوگرام منشیات برآمد ہوئی جس کی مالیت 5 کروڑ 13 لاکھ روپے سے زائد بتائی جا رہی ہے۔
ترجمان اے این ایف کے مطابق پہلی کارروائی اسلام آباد موٹر وے ٹول پلازہ کے قریب کی گئی جہاں ایک گاڑی سے 29 کلوگرام ہیروئن برآمد کی گئی اور دو ملزمان کو گرفتار کیا گیا۔
اسی مقام پر دوسری کارروائی کے دوران ایک مسافر کے سامان میں چھپائے گئے جوتوں سے 8.5 کلوگرام چرس برآمد کی گئی۔
تیسری کارروائی ضلع خیبر کے علاقے شاکس میں انٹیلیجنس معلومات کی بنیاد پر کی گئی جس میں 11 پولی تھین بیگوں میں چھپائی گئی 211.812 کلوگرام چرس برآمد کی گئی۔
ترجمان کے مطابق تمام کارروائیوں کے بعد انسدادِ منشیات ایکٹ 1997 کے تحت مقدمات درج کر لیے گئے ہیں اور مزید تحقیقات جاری ہیں۔