وفاقی وزیر داخلہ و چیئرمین پی سی بی محسن نقوی سے سری لنکا کے ہائی کمشنر ریئر ایڈمرل( ر) فریڈ سری ویراتنے نے ملاقات کی۔
سری لنکا اور پاکستان کرکٹ ٹیمز کے مینجرز، سی او او پی سی بی سمیر احمد، چیف کمشنر اسلام آباد، آئی جی اسلام آباد پولیس بھی اس موقع پر موجود تھے
ملاقات میں چیف کمشنر اسلام آباد و آئی جی اسلام آباد پولیس کی جانب سے سری لنکا ٹیم کو فراہم کردہ سیکیورٹی پر تفصیلی بریفنگ دی گئی۔
سری لنکا کے ہائی کمشنر نے اسلام آباد میں دہشت گرد حملے میں قیمتی جانوں کے ضیاع پر گہرے دکھ کا اظہار کرتے ہوئے متاثرہ خاندانوں سے دلی ہمدردی اور حکومت پاکستان سے اظہار یکجہتی کیا۔
محسن نقوی نے کہا کہ سری لنکن کرکٹ ٹیم کے کھلاڑی ہمارے اسٹيٹ گیسٹ ہیں، سری لنکن ٹیم کی فول پروف سیکیورٹی کے لیے تمام ضروری اقدامات کو یقینی بنایا گیا ہے، مہمان کھلاڑیوں کو محفوظ ماحول فراہم کرنا حکومت کی اولین ترجیح ہے۔
سری لنکا کے ہائی کمشنر کی جانب سے ٹیم کیلیے کیے گئے سیکیورٹی انتظامات پر اظہار اطمینان کیا گیا۔