سری لنکا کی ٹیم جو بڑی مشکل سے اس بات پر آمادہ ہوئی ہے کہ وہ پاکستان کا دورہ مکمل کرے گی ان کی سیکیورٹی 24 گھنٹے اب پاک فوج اور رینجرز کے نگرانی میں ہے۔
پاک فوج اور رینجرز کے جوان پولیس کے ساتھ مل کر سری لنکا کی ٹیم کہ ہر جگہ سیکیورٹی دیکھ رہے ہیں، چاہے وہ اسٹیڈیم ہو چاہے وہ ہوٹل ہو۔
سری لنکن ٹیم جو آج راولپنڈی میں پاکستان کے خلاف اپنا دوسرا ون ڈے انٹرنیشنل میچ کھیلے گی، کے کچھ کھلاڑی سیکیورٹی خدشات کی وجہ سے اپنے ملک واپس جانا چاہ رہے تھے، مگر دونوں ملکوں کی حکومتوں اور کرکٹ بورڈ نے مل کر ان کو یقین دہانی کرائی ہے کہ ان کو پاکستان میں کوئی خطرہ درپیش نہیں ہے اور ان کی سیکیورٹی کو مزید سخت کر دیا گیا ہے۔
پاکستان کرکٹ بورڈ کے چیئرمین محسن نقوی نے راولپنڈی میں صحافیوں کو بتایا کہ ایک وقت پر ڈیفنس منسٹر خواجہ آصف اور فیلڈ مارشل عاصم منیر نے سری لنکا کے ڈیفنس منسٹر اور سیکریٹری سے بات چیت کی اور ان کو یقین دہانی کرائی کہ ان کی ٹیم کی سیکیورٹی ان کی پوری ذمہ داری ہے۔
سری لنکا کے کھلاڑیوں سے ان کے صدر نے بھی بات چیت کی اور ان کو دورہ جاری رکھنے کا مشورہ دیا۔
محسن نقوی نے بتایا کہ اب مہمان ٹیم کو ریاستی سطح کی سیکیورٹی دی جا رہی ہے۔