ٹین پن بالنگ ایسوسی ایشن (آئی ٹی بی اے) کے زیر اہتمام دوسرا آئی ٹی بی اے ماسٹرز ٹین پن بالنگ کپ ٹورنامنٹ 22 نومبر کو لیزر سٹی بالنگ کلب، ایف سیون مرکز اسلام آباد میں کھیلا جائے گا۔
ٹورنامنٹ کا افتتاح پاکستان ٹین پن بالنگ فیڈریشن کے صدر اعجاز الرحمٰن کریں گے۔ گزشتہ روز اسلام آباد ٹین پن بالنگ ایسوسی ایشن کے جنرل سیکریٹری دانیال اعجاز نے بتایا کہ ٹورنامنٹ کی تیاریاں ابھی سے شروع کردی گئی ہیں اور ٹورنامنٹ میں وفاقی دارالحکومت کے باؤلرز حصہ لیں گے۔
انہوں نے بتایا کہ ٹورنامنٹ میں دو کیٹگریز کے مقابلے رکھے گئے ہیں جن میں سنگلز اور ڈبلز کیٹگریز کے ایونٹ شامل ہیں۔ ٹورنامنٹ کے اختتام پر کامیابی حاصل کرنے والے کھلاڑیوں میں انعامات تقسیم کیے جائیں گے۔
دانیال اعجاز نے کہا کہ ٹورنامنٹ کی تیاریوں اور انتظامات کا جائزہ لینے کے لیے آرگنائزنگ کمیٹی کا اجلاس 20 نومبر کو ہوگا جس کی صدارت اسلام آباد ٹین پن بالنگ ایسوسی ایشن کے آغا محمد علی شاہ کریں گے۔