پاکستان کے سابق ٹیسٹ کپتان اظہر علی نے اپنے دونوں عہدوں قومی سلیکٹر اور پاکستان کرکٹ بورڈ کے یوتھ ڈیولپمنٹ ہیڈ سے استعفیٰ دے دیا ہے۔ ان کے قریبی ذرائع کے مطابق پی سی بی نے ان کا استعفیٰ منظور بھی کر لیا ہے۔
ذرائع کا کہنا ہے کہ اظہر علی نے یہ فیصلہ اُس وقت کیا جب پی سی بی نے انہیں اعتماد میں لیے بغیر سابق کپتان سرفراز احمد کو قومی شاہین اور انڈر-19 ٹیم کا ڈائریکٹر مقرر کردیا۔
بتایا جا رہا ہے کہ اس معاملے کے علاوہ بھی اظہر اور بورڈ کے درمیان کچھ معاملات پر اختلافات موجود تھے جن کی وجہ سے انہوں نے عہدہ چھوڑنے کا فیصلہ کیا۔
ذرائع کے مطابق اظہر علی کا مؤقف تھا کہ چونکہ انہیں یوتھ ڈیولپمنٹ کا ہیڈ بنایا گیا ہے اس لیے قومی شاہین اسٹریم اور انڈر-19 ٹیمیں بھی ان کی نگرانی میں آنی چاہئیں تھیں۔
واضح رہے کہ اظہر علی کو گزشتہ سال 12 ماہ کے کنٹریکٹ پر پہلے قومی سلیکٹر تعینات کیا گیا تھا جس کے بعد انہیں یوتھ ڈیولپمنٹ کا سربراہ بھی بنایا گیا تھا۔