پاکستان کے ہاکی اولمپین طاہر زمان کو پاکستان ہاکی فیڈریشن نے پھر سے قومی ٹیم کا بطور ہیڈ کوچ چارج سنبھالنے کے لیے بلا لیا ہے۔
آج سے راولپنڈی کے نصیر بندہ اسٹیڈیم میں شروع ہونے والے قومی کیمپ کا آغاز طاہر زمان کی نگرانی میں ہوگا۔ ٹریننگ کیمپ اگلے مہینے ہونے والے ایف آئی ایچ پرو ہاکی لیگ کی تیاری کے لیے لگایا گیا ہے۔
پاکستان ہاکی فیڈریشن نے کیب میں 31 کھلاڑیوں کو بلایا ہے جبکہ طاہر زمان کے ساتھ مینجر انجم سعید، اسسٹنٹ کوچز ذیشان اشرف اور محمد عثمان ہوں گے۔
یاد رہے کہ اسی مہینے کے آغاز میں طاہر زمان نے بنگلادیش جانے سے انکار کردیا تھا جب پاکستان کی ٹیم تین میچز کی ٹیسٹ سیریز کھیلنے کے لیے وہاں گئی تھی۔ ایف آئی ایچ نے ٹیسٹ سیریز ترتیب دی تھی کیونکہ پاکستان کی ٹیم اس سال دو دفعہ دو بڑے ایونٹس میں بھارت نہیں گئی۔
طاہر زمان نے ڈھاکا جانے سے اس لیے منع کیا تھا کیونکہ ان کا فیڈریشن کے ساتھ سلیکشن کے کچھ معاملات پر اختلاف تھا۔ پرو ہاکی لیگ 9 سے 14 دسمبر تک ارجنٹینا کے شہر روساریو میں منعقد ہوگا۔