بلوچستان کے ضلع کچھی کی تحصیل سنی میں ایک المناک واقعے میں گھر کے اندر بارودی سرنگ کے دھماکے کے نتیجے میں تین افراد جاں بحق اور تین زخمی ہو گئے۔ جان بحق ہونے والوں میں دو بچے ندیم احمد اور سونا خان، اور نو عمر لڑکی بی بی بختاور شامل ہیں جن کی عمریں تقریباً 13 سے 14 سال ہیں۔
قائم مقام ایس پی کچھی کے مطابق دھماکا اس وقت ہوا جب گھر کے کم عمر بچے معمول کی سرگرمیوں میں مصروف تھے۔ پولیس کے مطابق نامعلوم افراد نے دو روز قبل متاثرہ شخص کے گھر میں بارودی مواد نصب کیا تھا جو آج زور دار دھماکے کے ساتھ پھٹ گیا۔
زخمیوں کو فوری طور پر مقامی اسپتال منتقل کر دیا گیا ہے۔ پولیس نے علاقے کو گھیرے میں لے کر شواہد اکٹھے کرنا شروع کر دیے ہیں اور واقعے کی مکمل تفتیش جاری ہے۔