پاک فوج اور کوئٹہ ڈسٹرکٹ سائیکلنگ ایسوسی ایشن کے باہمی تعاون سے شولا اسپورٹس کمپلیکس کوئٹہ میں خواتین کی سائیکل ریس کا کامیاب انعقاد کیا گیا جس میں خواتین کی بڑی تعداد نے بھرپور جوش و جذبے کے ساتھ شرکت کی۔
ریس کا ٹریک 5.9 کلومیٹر پر مشتمل تھا، جسے شرکا نے پرکشش اور چیلنجنگ قرار دیتے ہوئے اپنی سائیکلنگ مہارت کا بہترین مظاہرہ کیا۔ ریس کے اختتام پر پوزیشن حاصل کرنے والی کھلاڑیوں میں نقد انعامات، تمغے اور سرٹیفکیٹس تقسیم کیے گئے، جبکہ سب سے کم عمر اور معمر شرکا کی حوصلہ افزائی کے لیے بھی خصوصی انعامات رکھے گئے۔
تقریب میں شریک خواتین نے بلوچستان میں صحت مند اور مثبت سرگرمیوں کے فروغ پر پاک فوج کے کردار کو زبردست خراجِ تحسین پیش کیا۔ ان کا کہنا تھا کہ سائیکل ریس جیسے ایونٹس نہ صرف خواتین کی صلاحیتوں کو اجاگر کرتے ہیں بلکہ انہیں مزید آگے بڑھنے کا مواقع بھی فراہم کرتے ہیں۔
شرکا نے بلوچستان میں ایسے مزید کھیلوں کے انعقاد کی ضرورت پر زور دیا۔پاک فوج نے اس عزم کا اعادہ کیا کہ قومی ترقی میں بلوچ خواتین کی شمولیت کو یقینی بنانے اور انہیں بااختیار بنانے کے لیے آئندہ بھی ایسی سرگرمیاں جاری رکھی جائیں گی۔