وکٹ کیپر حمزہ ظہور کی شاندار ناقابل شکست نصف سنچری نے پاکستان انڈر19 کو افغانستان انڈر 19 کے خلاف ایک وکٹ کی ڈرامائی جیت سے ہمکنار کردیا۔
ہرارے اسپورٹس کلب میں تین ملکی انڈر 19 ون ڈے سیریز کے اس میچ میں حمزہ ظہور نے ناقابل شکست 68 رنز کی اننگز کھیل کر ایسے موقع پر اپنی ٹیم کو جیت سے ہمکنار کیا جب 201 کے اسکور پر 9 وکٹیں گرچکی تھیں۔
پاکستان انڈر 19نے ٹاس جیت کر افغانستان انڈر 19 کو بیٹنگ دی جو 50 اوورز میں 226 رنز بناکر آؤٹ ہوگئی۔
عثمان سعادت 75 رنز کے ساتھ ٹاپ اسکورر رہے۔ عثمان خان نے 37 رنز دے کر 4 وکٹیں حاصل کیں۔ محمد صیام اور دانیال علی خان نے دو دو کھلاڑیوں کو آؤٹ کیا۔ سمیر منہاس نے تین کیچز کیے۔
جواب میں پاکستان انڈر 19 نے 49 اعشاریہ 3 اوورز میں 9 وکٹوں کے نقصان پر مطلوبہ اسکور پورا کرلیا۔
سمیر منہاس پہلے ہی اوور میں صفر پر آؤٹ ہوگئے۔ عثمان خان 20 اور علی حسن بلوچ 14 رنز بنا کر آؤٹ ہوئے تو مجموعی اسکور 42 رنز تھا، اس موقع پر کپتان فرحان یوسف اور احمد حسین نے 89 رنز کی شراکت قائم کی۔
فرحان یوسف نے 6 چوکوں اور 2 چھکوں کی مدد سے 65 رنز کی اننگز کھیلی۔ احمد حسین نے 31 رنز بنائے لیکن وقفے وقفے سے گرنے والی وکٹوں کی وجہ سے پاکستان ٹیم کے لیے صورتحال مشکل ہوگئی تھی۔ اس موقع پر حمزہ ظہور نے ایک چھکے اور 8 چوکوں کی مدد سے 68 رنز ناٹ آؤٹ کی ذمہ دارانہ اننگز کھیلی۔ آخری بیٹر نقاب شفیق نے 9 گیندوں پر ایک رن ناٹ آؤٹ کے ساتھ حمزہ کا پورا پورا ساتھ دیا۔
سلام خان نے 44 رنز دے کر 4 وکٹیں حاصل کیں۔ وکٹ کیپر محبوب خان نے 4 کیچز اور ایک سٹمپڈ کیا۔
اس تین ملکی سیریز میں تیسری ٹیم میزبان زمبابوے ہے۔ پاکستان ٹیم اپنا دوسرا میچ پیر کو زمبابوے کے خلاف کھیلے گی۔ 2 جنوری کو اس کا تیسرا میچ افغانستان اور 4 جنوری کو زمبابوے کے خلاف ہوگا۔ سیریز کا فائنل 6 جنوری کو کھیلا جائے گا۔