نیشنل جونیر بیڈ منٹن شپ میں پختوانخوا کے کھلاڑیوں کی شاندار کارکردگی جاری، تمام کھلاڑی سیمی فائنل میں پہنچ گئے۔
پاکستان بیڈمنٹن فیڈریشن کے زیراہتمام لاہور میں جاری نیشنل جونیئر بیڈمنٹن چیمپئن شپ کے انڈر 15 میں خیبر پختونخوا کے حسنین خان نے خیبر پختونخوا ہی کے اکرام ﷲ کو دو صفر سے شکست دی، انڈر 17 کواٹر فائنل میں خیبر پختونخوا کے عبدالحسیب خان نے وپڈا کے خزیمہ شہزاد کو دو صفر سے ہرایا۔
دوسرے کواٹر فائنل میں خیبر پختونخوا کے نجم ثاقب نے پنجاب کے احمد عثمان کو دو صفر سے شکست دی، انڈر 19 کیٹگری میں خیبر پختونخوا کے قاری محمد عمر نے پنجاب کے ہارون خرم کو جبکہ خیبر پختونخوا کے حاثر شاہ نے خیبر پختونخوا کے فرحان احمد کو شکست دی، انڈر 19 ڈبلز میں قاری عمر اور عبدالحسیب نے احمد عثمان اور زین باجوہ کو شکست دیکر اگلے راﺅنڈ کیلیے کوالیفائی کیا۔
انڈر 21 کیٹگری میں خیبر پختونخوا کے تیمورخان نے پنجاب کے احمد نیاز کو دو صفر سے ہرایا جبکہ انڈر 21 ڈبلز میں تیمور خان اور نصر ﷲ نے پنجاب کے طاہر سبحانی اور فیضان کو دو صفر سے شکست دی جبکہ انڈر 21 گرلز کیٹگریز میں بھی خیبر پختونخوا کی لائبہ مشتاق اور مروہ جدون نے پنجاب کی طیب شفیق اور تمیہ قریش کو شکست دیکر سیمی فائنل کیلیے کوالیفائی کیا۔
خیبر پختونخوا بیڈمنٹن ایسوسی ایشن کے جنرل سیکریٹری میاں صداقت شاہ نے تمام کھلاڑیوں، کوچز حیات ﷲ، مسعود اور آفیشلز کو شاندار کارکردگی پر مبارکباد دیتے ہوئے امید ظاہر کی کہ خیبر پختونخوا کے کھلاڑی فائنل میں بھی بہترین کھیل پیش کرکے صوبے اور ملک کا نام روشن کریں گے۔ انہوں نے کھلاڑیوں کے لیے نیک تمناؤں کا اظہار کرتے ہوئے ان کی مزید کامیابی کے لیے دعا کی۔