راولپنڈی کے کنٹونمنٹ جنرل اسپتال میں خواتین کے واش روم میں خفیہ ویڈیوز بنانے کا سنگین واقعہ سامنے آیا ہے، جس پر پولیس نے فوری کارروائی کرتے ہوئے ملزم کو گرفتار کرلیا ہے۔
اسپتال کے سیکیورٹی سپروائزر نعمان کی مدعیت میں تھانہ کینٹ میں مقدمہ درج کر لیا گیا ہے۔ ایف آئی آر کے مطابق واش روم سے خاتون کی چیخ و پکار سنائی دینے پر سیکیورٹی عملہ فوری طور پر موقع پر پہنچا، جہاں ملزم کو رنگے ہاتھوں گرفتار کرلیا گیا۔
مقدمے میں بتایا گیا ہے کہ ملزم کے موبائل فون کی جانچ کے دوران خواتین کی نازیبا ویڈیوز برآمد ہوئیں، جس کے بعد پولیس کو طلب کیا گیا۔ پولیس کا کہنا ہے کہ ملزم کو حراست میں لے کر باقاعدہ مقدمہ درج کرلیا گیا ہے جبکہ واقعے کی مزید تفتیش جاری ہے۔
واقعے کے بعد اسپتال انتظامیہ اور شہریوں میں شدید تشویش پائی جاتی ہے، جبکہ متعلقہ حکام سے مطالبہ کیا جا رہا ہے کہ خواتین کی حفاظت یقینی بنانے کے لیے سخت اقدامات کیے جائیں۔