ریجنل ٹیکس آفس-II کراچی نے ان لینڈ ریونیو انٹیلی جنس اینڈ انویسٹی گیشن کے اشتراک سے کی گئی انفورسمنٹ کی ایک کارروائی میں جعلی ٹریک اینڈ ٹریس سسٹم (ٹی ٹی ایس) اسٹیمپس والی چینی کی ترسیل کرنے والے 3 ٹرکوں کو ضبط کرلیا۔
یہ کارروائی قومی شاہراہ پر واقع سسی ٹول پلازہ پر کی گئی جہاں تین ٹرکوں میں بظاہر چمبر شوگر ملز کے مجموعی طور پر 1,800 چینی کی بوریاں موجود پائی گئیں۔ ضبط کیے جانے والے ٹرکوں کے رجسٹریشن نمبرز TKA-042 ،SDA-899 اور AE-1488 ہیں۔
یہ کارروائی ٹریک اینڈ ٹریس نظام پر عملدرآمد کو یقینی بنانے، ٹیکس چوری کی روک تھام اور اشیائے ضروریہ کی غیر قانونی نقل و حرکت کو روکنے کی جاری کوششوں کا حصہ ہے۔
جعلی ٹی ٹی ایس اسٹیمپس کی نشاندہی پر گاڑیوں کو فوری طور پر تحویل میں لے کر مزید تفتیش اور ضروری قانونی کارروائی کے لیے آر ٹی او-II، کے نیپا پریمسسز میں منتقل کردیا گیا۔مزید کارروائی متعلقہ قوانین اور ضوابط کے مطابق عمل میں لائی جائے گی۔