اینٹی نارکوٹکس فورس (اے این ایف) نے تعلیمی اداروں کے اطراف اور ملک کے مختلف شہروں میں منشیات اسمگلنگ کے خلاف بھرپور کریک ڈاؤن کرتے ہوئے 5 ملزمان کو گرفتار کر لیا۔ کارروائیوں کے دوران 24 کروڑ 48 لاکھ روپے سے زائد مالیت کی 258.94 کلوگرام منشیات برآمد کی گئیں۔
ملتان کے ساہو چوک میں ایک کارروائی کے دوران ایک ملزم کے بیگ سے 2 کلوگرام آئس برآمد ہوئی، جس نے اعتراف کیا کہ وہ طلباء کو منشیات فروخت کرتا تھا۔ لاہور میں گلبرگ کے ایک کوریئر آفس سے ریاض بھیجے جانے والے پارسل میں کتابوں میں چھپائی گئی 2.5 کلوگرام آئس پکڑی گئی، جبکہ علامہ اقبال انٹرنیشنل ایئرپورٹ کے کارگو شیڈ سے دبئی بھیجے جانے والے پارسل میں 765 گرام آئس برآمد ہوئی۔
لاہور کے شاہ جمال روڈ سے برطانیہ بھیجے جانے والے پارسل میں 6.72 کلوگرام وزنی 67,200 والیم گولیاں اور جی ٹی روڈ لاہور سے کراچی سے آنے والے پارسل میں 20.16 کلوگرام والیم گولیاں برآمد ہوئیں۔ پشاور، کوہاٹ، اسلام آباد اور کوئٹہ کے مختلف مقامات سے 15.6 کلوگرام افیون، 13.2 کلوگرام چرس اور 198 کلوگرام ہیروئن بھی ضبط کی گئی۔
اے این ایف حکام نے بتایا کہ تمام کارروائیوں میں انسداد منشیات ایکٹ 1997 کے تحت مقدمات درج کر کے تحقیقات کا آغاز کر دیا گیا ہے۔