ڈائریکٹر بنگلادیش کرکٹ بورڈ نظم السلام کے بیان کے بعد کرکٹرز نے بائیکاٹ کی دھمکی دے دی۔
بنگلادیشی کھلاڑیوں نے تمام فارمیٹ کے کرکٹ کے بائیکاٹ کی دھمکی دیتے ہوئے نظم السلام سے استعفے کا مطالبہ کردیا۔
کرکٹ ویب سائٹ کے مطابق بائیکاٹ کی دھمکی کے بعد بنگلا دیش پریمیئر لیگ کے میچز متاثر ہونے کا بھی خدشہ ہے۔
دوسری جانب نظم السلام کے بیان پر صدر بنگلا دیش کرکٹرز ویلفیئر ایسوسی ایشن محمد متھون نے کہا کہ نظم السلام کوبی پی ایل کے میچز سے قبل مستعفی ہوجانا چاہیے، بصورت دیگر کرکٹرز نہیں کھیلیں گے، نظم السلام کے ریمارکس کھلاڑیوں کے وقار، پروفیشنل ازم اور عزت کے خلاف ہیں۔
دریں اثنا بنگلا دیش کرکٹ بورڈ نے بھی نظم السلام کے بیان سے لاتعلقی کا اعلان کیا ہے۔
بی سی بی اعلامیے کے مطابق بورڈ توہین آمیز یا دل آزاری کا باعث سمجھے جانے والے بیان پر دکھ کا اظہار کرتا ہے، بورڈ ترجمان کے علاوہ کسی ڈائریکٹر کے اس طرح کے بیان کی ذمے داری نہیں لیتے، کرکٹرز کی توہین کرنے والے افراد کے خلاف بورڈ ڈسپلنری ایکشن لے گا۔
یاد رہے کہ نظم السلام نے بنگلا دیش کے ورلڈ کپ سے بائیکاٹ کی صورت میں کھلاڑیوں کو مالی ازالہ نہ کرنے سمیت سخت الفاظ کا استعمال کیا تھا۔