ڈائریکٹوریٹ جنرل اسپورٹس خیبر پختونخوا کے زیر اہتمام اسٹیٹ چلڈرن کے لیے اسپورٹس فیسٹیول 21 جنوری سے شروع ہو رہا ہے، جس کی افتتاحی تقریب صبح 11 بجے ماڈل انسٹیٹیوٹ فار اسٹیٹ چلڈرن زمونگ کور، چارسدہ روڈ پشاور میں منعقد ہوگی۔ مہمان خصوصی مشیر کھیل و امورِ نوجوانان تاج محمد ترند ہوں گے، جبکہ سیکرٹری سپورٹس محمد آصف خان، ڈائریکٹر جنرل سپورٹس تاشفین حیدر اور دیگر اعلیٰ حکام بھی موجود ہوں گے۔
چار روزہ فیسٹیول میں بیڈمنٹن، ہاکی، رسہ کشی، میوزیکل چیئر، والی بال، کرکٹ، فٹسال اور آرچری کے مقابلے شامل ہوں گے۔ اس میں زمونگ کور پشاور، زمونگ کور ایبٹ آباد، زمونگ کور سوات، ڈی آئی خان کیمپس، اخپل کور سوات، ایس او ایس، مرسی، آغوش اور دیگر بچوں کے اداروں کے 500 سے زائد بچے حصہ لیں گے۔
اختتامی تقریب 24 جنوری کو ماڈل انسٹیٹیوٹ فار سٹیٹ چلڈرن میں ہوگی، جس میں وزیراعلیٰ خیبر پختونخوا سہیل آفریدی بچوں میں انعامات تقسیم کریں گے۔
محکمہ کھیل کے مطابق اس فیسٹیول کا مقصد سٹیٹ چلڈرن میں موجود کھیلوں کے ٹیلنٹ کو اجاگر کرنا، انہیں تفریحی مواقع فراہم کرنا اور مستقبل میں صوبائی و قومی سطح پر نمائندگی کے مواقع میسر کرنا ہے، تاکہ بچے اپنی صلاحیتیں دکھا سکیں۔