ڈیرہ اسماعیل خان کے علاقے قریشی موڑ بائی پاس کے قریب امن کمیٹی کے سربراہ نور عالم محسود (عالم جان محسود) کے گھر شادی کی تقریب کے دوران خودکش دھماکا ہوگیا، جس کے نتیجے میں ابتدائی اطلاعات کے مطابق 5 افراد جاں بحق جبکہ متعدد زخمی ہوگئے۔
ذرائع کے مطابق دھماکا شادی کی تقریب میں جاری میوزک پروگرام کے دوران کمرے کے اندر ہوا، جس سے پورا کمرہ منہدم ہوگیا۔ جاں بحق ہونے والوں میں معروف کمانڈر جگری بھی شامل ہیں۔
واقعے کے فوراً بعد علاقے میں شدید خوف و ہراس پھیل گیا۔ ریسکیو، بم ڈسپوزل اسکواڈ اور سیکیورٹی فورسز کی ٹیمیں موقع پر پہنچ گئیں، جبکہ علاقے کو گھیرے میں لے کر سرچ آپریشن شروع کر دیا گیا۔
زخمیوں کو فوری طور پر قریبی اسپتال منتقل کیا جا رہا ہے، جہاں بعض زخمیوں کی حالت تشویشناک بتائی جا رہی ہے۔
دھماکے کی نوعیت اور حملے کے ذمہ داروں کے تعین کے لیے تحقیقات جاری ہیں، تاہم تاحال کسی تنظیم کی جانب سے حملے کی ذمہ داری قبول نہیں کی گئی۔